有讀者Fax過嚟投訴，話電腦男講完HDDVD高清影碟，點解冇咗Blu-ray份嘅？查實電腦男唔係愉懶，只不過近排稿擠啫，為向呢位讀者賠個不是，今日一於加大篇幅，講吓電腦男對Blu-ray嘅愚見。
查實東芝同SONY唔係今時今日先以高清光碟制式互鬥，早喺95年紅光雷射年代已互不妥協，直到後期先「揸爬」扮Friend，統一光碟制式。今次戰場轉到高清光碟制式，由紅光玩到藍光，HDDVD及Blu-ray其實一樣採用藍色光束，主要分別係其雷射頭波長及記錄密度，而且兩者同樣兼容現存DVD光碟。
三大撒手鐧
孰優孰劣現在尚言之過早，電腦男鍾情SONY、Panasonic陣營嘅Blu-ray，最主要係貪佢荷李活猛片較多；唔計SONYPicture自家龐大電影數量，呢兩年亦陸續有唔少強大片商加盟，如21世紀霍士、迪士尼等，仲未計其他游離派公司隨時掉轉槍頭，如派拉蒙就變成兩頭蛇。單以電影片種計，電腦男絕對支持Blu-ray，等住睇有《蜘蛛俠3》、《達文西密碼》、《SilentHill》！而且Blu-ray影碟售價亦預計在港幣200上下，跟HDDVD影碟相若，明顯廠商壓低售價跟對方拼過！
第二點支持Blu-ray，當然係年尾蒲頭嘅PS3啦，市場預計PS3將蝕住賣，售價應壓至港幣四千蚊，絕對可進一步提高Blu-ray嘅市佔率。最後一點就係Blu-ray容量高達50GB，而HDDVD則為30GB，兩者差距未必在影碟上有太大分別，最多係Blu-ray裝多個1,920超級HD格式啫，不過去到PC市場就唔係咁講，需知一隻碟相差20GB，的確唔係小數目！燒錄嘅話更可擺下更多Data、相片同影片，對未來應用有更多優勢！
美國市場研究公司Forrester亦預言，SONY嘅Blu-ray最終會擊敗HDDVD規格，成為下一代DVD標準，但勝利肯定得來不易，除非東芝臨陣退縮，否則將出現三年以上嘅長期抗戰。