上周五晚杜指跌近百點，原因係人工上升，令通脹重燃，並損害企業盈利。不過美國職位增加亦係好數據，唔使太驚，美股唔會大散。
本港錢多，金錢主人金睛火眼睇住個市想搵銀，港股如果調整，啱晒佢哋入市買貨。有平C輪，要買。
地鐵C輪4538：地鐵（066）上周五話咁快就升見19元新高，收18.90元，升0.65元。啲C輪紮紮跳，其中9073升32%，收2.90元；大價輪一樣升得好好睇睇。4788亦急升23%，收2.15元。
地鐵係芬佬力捧股份，就算PE高啲，都仲係有得去，同港交所（388）一樣，不斷創出新高。地鐵有得睇，揀C輪炒，向未升得夠嘅4538埋手。4538上周五只係升得10%（2.5仙），收26.5仙，明年4月中到期，大把時間，溢價3.3%，槓桿率7.1倍（有效5.6倍），引伸波幅17.9%。地鐵C輪中，呢隻交投最旺，上周五有41球成交，如果睇錯正股要止蝕，亦易過借火。
長實C輪9871：市場對和黃（013）嘅「3G恐懼症」消退，和黃硬番，大股東長實（001），亦可睇番好啲，吼長實平平哋，買C輪。
主角係9871，6月上旬夠鐘，輪價44.5仙，溢價0.8%，槓桿率18.8倍（有效12.5倍），引伸波幅21.1%。其次可以揀嘅係2215，呢隻壽命較9871長3星期。
章盛