不經不覺《盜墓者》呢個殿堂級動作冒險系列，已經面世咗超過十個年頭，雖然佢有好幾集口碑唔係咁好，但始終咁耐以嚟養落唔少Fans，大家依然好期待佢會有令人耳目一新嘅新作面世。最新作品《盜墓者傳說》終於會喺呢個禮拜見街，包括靚靚XBOX360在內多個版本將同時上市，佢糅合咗跳嚟跳去同食腦冒險元素於一身，稱得上係近幾年做得最吸引人嘅一劑！
文：陳福榮
雖然羅拉過去一直都好風光，就算概念明抄不朽巨著《波斯王子》都可以賣個滿堂紅，搞到連對方都要學番佢轉頭！然而三年前所謂嘅次世代平台第一擊《盜墓者：黑夜天使》換嚟慘死收場，累得EIDOS拿拿聲班救兵，搵嚟CrystalDynamics幫佢重新做過新作。亦因為上集有太多無謂冒險成份，揸槍場面大幅刪減，仲要好無謂咁學好多招式，完全冇晒《盜墓者》應有嘅爽快感，𠵱家新作唔敢再亂嚟變番好似以前咁款，主要係以飛簷走壁開槍殺敵為主，再加少少食腦解謎變成𠵱家嘅模樣，務求挽回玩家信心。
因應場景玩換裝
今集羅拉要到嘅地方可真不少，包括南美洲嘅波利維亞及秘魯、亞洲大都會東京、非洲嘅加納以及位於歐亞邊緣嘅哈薩克等。其中東京同哈薩克更加唔係成日出現嘅遺迹或古墳之類，而係黑幫總部同秘密研究所，單係場景玩起嚟都算多變化，縱使要求技術分別不大至少視覺上有好大衝擊先吖。因為有咁多地方要去，無可能要羅拉成日着住貼身上衣襯熱褲㗎，因此今集就引入咗服裝系統，玩家會因應實際需要換上各種服飾。而且除咗基本嗰三套之外，有幾套特別衫更可以喺遊戲入面執到，諗起羅拉可以Cosplay都咪話唔盞鬼。
輔助工具多唔易悶
以前有朋友提過，《盜墓者》明抄平面版《波斯王子》都唔係咩罪過，只係頂唔順佢咁耐都係咁玩，一啲新意都冇，到今集就導入咗唔少隨身工具，務求將佢變得動作、射擊與冒險成份並重。除咗雙槍、散彈槍呢啲武器外，羅拉仲可借助磁性游繩拉實油桶等物件，從而做出攀山越嶺效果，此外仲有超光手電筒、通訊耳機和PDA等物品，令佢可以喺原始地帶突顯自己嘅高科技水平。另一方面，同以前差唔多今集都可以駕駛電單車或者吉普車，令遊戲不致太過悶，但由於作為間場部份它固然唔會花費太多時間，當畀大家過吓手癮咁解。
測試評分
基本上今集可謂積極洗底，畫面音效做得好就固然啦，佢肯大刀闊斧唔將世界觀集中晒喺悶到爆嘅洞窟遺迹之類，加入東京都市版面已經叫做有好大進步加上挑戰大家意志同心思嘅金銀銅級寶物系統重現，好適合一般冇咩要求又或者想儲齊所有圖鑑同Movie嘅人。另外難易度設定並唔會改變解謎或者動作嘅麻煩程度，只會影響敵人體力同可拾取回復藥及子彈數量，初哥打爆咗Easy都可以逐步挑戰HardMode拎更多正嘢。
PROFILE
遊戲類型：動作冒險
對應機種：PS2、XBOX/360、PSP、PC
遊玩人數：1人
開發商：EIDOS
(C)2006CoreDesignLtd.DevelopedbyCrystalDynamics.