公司成功上市，做主席通常都好肥仔，除咗身家暴漲，體重跟住漲嘅情況不時出現，事關飲宴應酬都多咗，好似做建築嘅匯隆（8021）主席蘇汝成，公司01年尾上市個陣，佢160磅，近日華華再見佢，就超過180磅，足足多咗廿幾磅。
佢笑笑口話，舊年生意多咗五成，員工花紅平均有個幾兩個月，上市後多咗好多澳門工程，平均每星期都要過大海走一轉，當地咁多美食，真係好難忍到口。佢最愛係咖哩蟹同馬介休，講起都食指大動，日子有功，咪所有西裝都要買過晒囉！
咁有冇做運動減肥呢？蘇主席話純KeepFit就打網球，傾生意就打高球，至於波友係邊個？佢就點都唔肯講！企喺隔籬嘅蘇太就話，得閒都會跟埋老公過澳門，點忙都好，全家人每年都會去兩次旅行，好似新年就去韓國滑雪。咁識做，唔怪之得冇投訴啦。