小T做咗小學教師兩年，啱啱被炒魷魚，要搵番另一份小學教職，唔係容易。點解被炒呢？據小T講，佢一位最要好嘅同事，被校長要求做埋一啲課外活動項目嘅收支會計表，小T對好友講：「你又唔係讀會計，對會計冇認識，做乜鬼吖，叫校長搵過第二個做啦！」一去稟報校長，校長話佢兩個斤斤計較，冇團隊精神，冇幾耐就搵個藉口炒咗位同事，小T覺得飯碗要緊，立即唔敢出聲，向副校長請求指點，副校長話：「我哋都自身難保，你小心啲啦。」小心乜嘢吖，前日校長與一眾教師開會，當場宣布小T嘅兩年合約於今年八月到期，期滿不會續約，請小T另謀高就。
小T無可奈何，覺得自己有冤無路訴，於是按章工作，上完堂，改完簿之後，乜都唔做，懶得做教改工作與帶學生參加校外活動，一於按章至八月底止，校長亦視佢為透明人，睬都唔睬。
現今小學數目多，學生人數少，解約教師搵工唔容易，小T尚未夠二十五歲，如果轉行，由頭來過，未必冇好處，問題係如何轉行？究竟會唔會有人請？此則非左丁山所知也。不過冇所謂嘞，小T有的是青春，只要繼續肯學肯捱，使乜要學習睇校長面色，做佢隨從？
有好多人批評羅范椒芬呢樣嗰樣，其實羅太有度好，就係夠硬淨，夠膽批評一啲閂埋門做皇帝嘅校長。左丁山從教育界人士口中得知，有啲校長只識粉飾櫥窗，猛咁要向教統局攞威，乜活動經費都申請一大爛餐，申請得到就逼教師兼任幾個活動項目嘅負責人，做到教師氣咳。用經濟學概念講，學校冇absorptioncapacity（吸收能力）而夾硬催谷，受害嘅只會係教師，學生亦無得益。教統局批出額外活動費時，先要查明校長是否搞「政績工程」，是否好大喜功！