上周港股大升666點，有股友即時話港股凶兆出現。趙飛雲N年前睇過《凶兆》一戲，當然知道佢講乜嘢，但心諗秋官都冇好友辦法，3個6又算得係乜嘢。
但事有湊巧，美股上周五又跌得幾應棍。美聯儲局官員暗示加息幅度將較預期大，美股借勢調整，杜指跌96點或0.86%，而納指亦跌22點或0.94%，再睇埋在美國預託證券上市的香港大藍籌普遍下跌，港股今日低開似成定局，但就未必會跌得太多，可能跌至上周五低位16329就會展開反彈，若最後是輕微下跌或輕微上升收市，則顯示港股短期未升完。
外圍下跌影響短暫
趙飛雲近年每日觀市所得，若大戶要造上之時，就算外圍大跌亦只會產生短暫效應，恒指在過去1年，有一段不短時間與美股走勢背馳，美股展開調整亦無法拖累港股大跌。慣常的走勢是外圍下跌，港股跟隨低開，然後跌幅逐步收窄，最後以微跌或微升收市。
以上的走勢經常出現在好友主導大局的日子裏，外圍下跌通常引來散戶早市追沽期指淡倉，令大市大幅低開，但好友實力夠強則可以從低位買上，令跌幅逐步收窄，而跟沽的散戶一旦見大市反彈並升穿他們的計數位，便會慌忙平倉止蝕，而這類平倉盤，往往變為推高期指的動力，同時帶動現貨回升。
港股近期亦是由好友主導，且看今日會否出現同樣走勢。
倉內持有4股，建行（939）是逢低收集，若見跌至3.35元會買第2注。首國（697）暫受制於0.72元阻力，短期若在0.69-0.72元上落可繼續持有。世城（355）0.12元有回吐，暫以0.113元作計數位持有。玉皇朝（970）0.61元不宜失守，否則先計數。
趙飛雲