大市開大,升破兩個多月徘徊區頂部16000阻力,衝上16535,成交更大增,萬六大關已由阻力變成支持。港股大升浪確認,但短期急升後會出現反覆,整固完成後,再向高位進發,目標係17000。今年以來,唔少二三線股已大幅飆升,幅度更以倍計。未來一兩個月嘅好市中,未有大升過,而又有業績支持的落後股,有機會從後趕上,迎接大旺市,落後股可優先選取。
中國稀土(769)上周五又再破位而上,收1.85元,升8.1%,成交又上番4500多萬股。記得上月底推介時,股價1.51元,跟住做「披成」,復牌後1.45元水平任買,家下已升咗0.40元,聽聞基金已上晒車,後市仲可以睇好,揸定定,等心滿意足價回吐。
仲有1隻,係中國糧油(506),上月22日推介,當時股價4.25元,近日高價見5.15元。中糧宣布業績對辦,公司亦表明重組大計會陸續推行,短線股價整固後,可向5.80元至6元水平推進;中線睇幾多?中資心目中嘅目標價係10元過外。
街貨疏易炒上
今日推介天虹紡織(2678),04年底上市,近日宣布05年度(12月年結)業績有理想增長,股價亦表現強勢。
集團去年營業額19.1億元(人民幣.下同),升35.3%;獲利1.8億元,升31.5%,每股盈利21仙,升10.5%,因上市發行新股攤薄,派末期息6.5港仙;去年上半年賺7965萬元,下半年上升到1億元。
天虹係內地高附加值棉包芯上游紡織品供應商,未有受美國及歐盟對內地實施配額所影響。去年業績理想,主要係紡線產能擴充,毛利率提升1.7個百分點至17.9%。
06年業績展望更佳,集團紗綻數目已增到40萬個,今年紗線產能可大幅提升48%,而公司會物色更多低成本收購及擴張機會,目標係今年底將紗綻數目增至55萬個,估計全年盈利可上升到2.4億元,每股盈利27仙,預測PE僅6.5倍。
天虹貨源集中,亦係基金股,(惠埋持有5.35%),街外流通貨量只16%,約1.4億股,若有基金再增持,股價不難會搶升。天虹現時走勢正形成旗形整固,升破1.80元阻力,目標即指向2.20元。
郭兆誠