滙豐去年底重組亞太區個人理財業務，主管大執位，「銷聲匿迹」咗嘅滙豐銀行「個人理財業務總部銀行服務及按揭業務主管」羅康平（圖），聽講將加盟中銀香港（2388），做零售銀行業務部總經理，直屬副總裁林炎南，短期內會有公布。
中銀香港近年多次在外羅致人才，佢哋兩名副總裁李永鴻及張祐成，以及職級屬總經理級別的資訊科技總監廖仁君，都係外援。至於職員總數逾5000人、𠵱家共有五名副總經理的零售銀行業務部，主管主要靠內部晉升，較少向外挖角。
在滙豐做咗超過廿年的羅康平，曾任經濟研究員，最擅長本地按揭生意，佢得中銀香港垂青，睇嚟該行會繼續喺按揭市場進攻。
自中銀香港重組後，主管零售銀行業務的副總裁林炎南一直兼任該部門總經理，去年初企業銀行部新任副總裁高迎欣履新後，把部門總經理一職交給林廣明，咁零售銀行部用相同模式都好正常，總經理從副總裁一職中分拆，由另一人擔任。
滙豐現任亞太區個人理財業務存款、按揭及專項業務主管係中葡混血兒施穎茵，呢個靚女兼管本港及亞太區按揭業務，日後就要面對一個「知己」嘅對手。