孫柏文謹代表《金手指》一欄同社會各界講句：「多謝！」。多得一班社工同好心人，好似我呢啲患有注意力缺乏（AttentionDeficitDisorderADD）嘅長期病患者，開始受到社會有關人士注視。《蘋果日報》為求明白社會對呢隻病嘅長期病患者有幾高容忍度，所以進行一場大型社會實驗，就係將《金手指》一欄發大，睇吓大家可以忍到幾時，先至大規模寫信嚟叫孫柏文收番隻金手指。所以，由今天開始，試用性咁畀《金手指》多啲篇幅。
作為《金手指》一欄fan屎嘅你，肯定作過好多關於本欄點解叫《金手指》嘅猜測。孫柏文都已經估到，你哋一定係諗緊：「孫柏文硬係鍾意篤人背脊，所以先將個專欄叫《金手指》。」大家都估錯！真正原因除咗我鍾意用隻金手指去篤爆啲謬論之外，其實係想紀念一齣戲──《鐵金剛大戰金手指》（Goldfinger）。
因為戲中講祖國政府英勇地計劃了一場，在美帝手中攞番我哋中華人民多年來被搶去黃金白銀嘅行動。在戲中祖國政府又憑共產真理，成功說服在外國崇尚自由貿易嘅親華人士，得到佢哋嘅支持。可惜，那個叫AuricGoldfinger嘅親華人士因為資源缺乏，迫不得已要修改計劃。抱着一個「中華人民冇，美帝都要冇」嘅革命精神，由原先要攞番美帝手中嘅黃金，變為完全摧毀美帝手中嘅黃金。不過，最後這場精心策劃行動，被一個酗酒濫交嘅英帝間諜，好符碌咁破壞咗。
白銀又新高的啓示
孫柏文就係希望延續「還祖國人民，黃金白銀」嘅精神，將本欄改名為《金手指》喇。
講起白銀，上個禮拜五又再一次喺多年新高位收市。而要達到金手指喺3月6日為大家篤出嘅120美元目標價，已經唔需要升十二倍。𠵱家升十倍就已經到目標價。主要原因係花旗國交易所（AmericanStockExchange）嘅揸fit人話，花旗國證監會批准「白銀投資基金」喺呢個禮拜開始進行買賣。點解呢個「白銀基金」會搞到銀價日日創新高呢？
金手指曾經為大家篤過有關巴克萊銀行「白銀基金」嘅細節。佢係一個有股票編號嘅基金，可以好似股票咁買賣。你每買一手基金，巴克萊銀行就即刻喺公開市場買一盎斯實貨白銀放響貨倉裏面。等大家買實貨白銀好似買股票一樣咁易。點解咁做？因為好多花旗國市民，除咗買股票外，其他投資渠道欠奉。
忽視追買基金單位
咁「白銀基金」點樣推高銀價呢？據聞，「白銀基金」上市已經吸引到足夠資金買高達1.3億盎斯白銀。做個比較，每年在各國銀鑛生產嘅白銀都只得6億盎斯，但每年全球白銀需求有8億盎斯。而紐約商品交易所（Comex）白銀存倉量，也只剩1.24億盎斯，比九十年代中下跌70%。如果「白銀基金」一夜之間，將紐約商品交易所嘅白銀攞走，咁白銀用家就要即刻開始搶白銀。咁白銀仲去唔到120美元？
雖然，有好多財經口水佬話「白銀基金」一上市，白銀就會回吐，不過孫柏文唔係短線走勢嘅「專家」，所以我都係NoComment。我隻金手指只知道，話「白銀基金」上市，白銀就會有回吐嘅財經口水佬，講到「白銀基金」好似一間公司上市咁，上市之後會有一段時間唔批新股。完全忽視如果基金上市後，投資者追買基金單位，「白銀基金」就要再去買白銀。所以如果大家諗住用「白銀基金」上市等白銀回吐呢個入市機會，我都係得一句：「祝君Timing好運！」
孫柏文