有「低音歌后」之稱的潘秀瓊，五十年代由新加坡來香港發展，以一曲《情人的眼淚》俘虜了歌迷的心，就連已故歌手鄧麗君也是她的知音，後來更成為無所不談的知己。回想當日鄧麗君唱歌唱到拋眼睫毛落台、大講黃色故事，還一起追捧日本靚仔歌手加山雄三的日子，潘秀瓊笑說：「喺我心裏面，佢（鄧麗君）從未離開過呢個世界。」 撰文：戴彩煥
自幼家貧的潘秀瓊，十二歲便展開漫長的唱歌生涯，經過多年努力，終於憑《情人的眼淚》、《家家有本難唸的經》及《峇里島》等金曲登上歌后寶座。七一年，潘秀瓊險些被腦部腫瘤奪去性命，但她從沒想過放棄音樂，她用肯定的語氣說：「音符係我嘅生命，我絕對唔會退休，除非我瞓低，但我瞓低咗，大家都會聽到我把聲，因為仲有咁多唱片喺度。」
整蠱專家 夜半敲門
永不言休的潘秀瓊還開班授徒，傳授唱歌心得，她說：「我最想開一間教人聽歌嘅學校，因為𠵱家啲人只顧音響靚畫面靚，連歌手唱乜嘢都可能唔知。」
低沉而磁性的聲線，令潘秀瓊在五十年代樂壇突圍而出，已故歌手鄧麗君更由她的知音變成知己。潘秀瓊說：「我哋好有緣，七十年代，我同佢、楊燕一班台灣歌手去新加坡做騷，當年有幾個台灣歌手鬥得好厲害，但佢（鄧麗君）就唔鍾意同人爭，我都係唔鍾意交際嗰種人。佢話好鍾意聽我唱歌，我又讚佢把聲好甜好靚，大家惺惺相惜，愈傾愈啱傾。」
潘秀瓊續說：「有次我住九龍酒店，佢打電話畀我，話啱啱做完運動，想上嚟沖涼……之後我每次嚟香港，佢都會搵我，仲係失驚無神嗰種。平時我叫佢做『小鬼』，佢真係好鬼馬，試過拍我房門扮roomservice，又鍾意講埋啲黃色古仔，佢好多呢啲古仔，講極唔完，佢癲我咪同佢癲囉！」
兩人最深交最開心的日子，是七十年代鄧麗君到日本發展那段時間，潘秀瓊說：「當年我去日本學時裝設計，佢就去日本發展，初初公司要佢落pub唱歌，吸收舞台經驗，佢都有叫我俾啲意見。佢嗰次唱唱吓歌，突然掹條假眼睫毛拋落台，真係俾佢嚇一跳。我哋又成日遊車河，一齊睇演唱會。佢好迷加山雄三，話佢好靚仔，唱歌又好聽，叫我唔好同佢爭！」
寄情美酒 瘋狂購物
兩人最後一次見面，是九十年代初，潘秀瓊回憶說：「嗰陣佢約我去文華食晏，開咗支pinkchampagne（粉紅香檳）。佢好鍾意排場，食餐晏都要幾千銀。跟住去行街買嘢，呢樣要兩件、嗰樣又要兩件，見佢咁買嘢法，我真係好心痛！點知行咗冇耐，佢又話要去飲嘢，又要叫pinkchampagne，飲完之後仲開咗支XO，結果都係飲剩一半。」
九五年，潘秀瓊從新聞報道中獲悉鄧麗君在泰國哮喘病發逝世，登時嚇呆：「識佢咁多年，都未見佢哮喘過，聽到呢件事，梗係好難過，但喺我心裏面，佢從未離開過呢個世界，佢永遠活喺我心裏面。」
部份圖片及資料提供：潘秀瓊、陳永業
