這邊廂港府最終落實07年實行數碼廣播，那邊廂HD-DVD亦正式證實「開片」日期，日子重要係好快嗰隻，4月18日就馬上有得睇！據知最快到港電影，分別為《歌聲魅影》、《最後武士》同《擊情》！定價為$30美金，行內人估計到港時水貨價大概為$200-$230港元，同𠵱家嘅美版1區碟只係相差幾十蚊，須知佢一碟已包含DVD（480p）及HD-DVD（1,080i）兩種播放影片格式，相信好多買開1區美版人士，都會轉投HD-DVD陣營！
至於大家更關心嘅播放機問題，據知香港不少AV影音舖已經四出到日本及美國等地撲貨，無計啦！香港TOSHIBA方面表示，最快都要到年底先至會有HD-DVD機返，呢段時間真係唯有靠水貨舖做嘢！至於價錢方面，估計會有普及版及HighEnd版兩種機款推出，機價由$4,000-$8,000餘元不等；另外一提大家，新出HD-DVD格式影碟，同我哋睇開嘅DVD影碟有些少唔同，係並無設地區區碼之分，所以一碟在手，係HD-DVD機就一定播到！而且嚟緊5月，SONYBlu-ray亦已經殺緊埋嚟！今年絕對係香港人的高清年！
