劇院櫈
黃耀明
「呢幾張櫈係嚟自一間法國劇院嘅，好鍾意佢夠舊，放喺控制室呢度亦好啱。我𠵱家開始做埋電影同廣告配樂，如果喺控制室放張梳化會大過頭，放呢幾張櫈就fit晒，又可以多幾個人坐喺度一路睇住個畫面，一路配樂。」
落妝油&大梳化
二汶
「唔知點解我入到呢間錄音室，第一眼就好愛呢張大梳化，愈坐愈舒服，張梳化又夠大，我哋可以一齊坐喺度食嘢傾偈，又可以睇電視，同返屋企冇分別。」
Ellen
「我最愛嘅物品就係一支落妝油（圖二箭嘴示），因為佢見證我同二汶嘅轉變，以前入行時我哋好憎化妝，做完嘢第一時間衝返公司個廁所落妝，但𠵱家已經習慣晒囉。」
問話燈
蔡德才
「最鍾意係我擺琴個架同盞燈，我覺得啲工字鐵好有工場味道，個架就令啲嘢更有效率。我以前冇諗過工作枱上有盞燈，呢盞燈畀我嘅感覺好似喺扣留室俾人問話咁，個feel好正。」
貼紙門
Veegay
「我最愛就係呢道貼紙門，呢道門係由舊studio搬過嚟，我強烈要求要帶埋佢走。我一直好鍾意貼紙，啲朋友知道後就送好多得意嘅貼紙畀我，貼貼吓就貼到成道門滿晒，我仲計劃整道新門再貼過。」
學生櫈
PixelToy
「我哋好鍾意呢兩set小學生課室枱櫈，𠵱家好難搵到咁懷舊嘅嘢，次次坐上去都覺得自己返老還童，返番小學生年代，個感覺好得意同有趣。」
