憑拍商業片成名的劉偉強，是首位被韓國片商看上拍韓片的香港導演，他在新片《雛菊》（Daisy）與野蠻女友全智賢合作。對於拍攝韓片，劉偉強半開玩笑說：「好咪名留青史，唔係咪遺臭萬年囉！」雖然他看似沒信心，但，哪個導演不是胸有成竹？看來香港和韓國的電影史，都要準備記下劉偉強這個名字。 撰文：馮美茵 攝影：陳偉權
導演是電影的靈魂，一個成功的導演可以菲林代替說話，表達所思所想，若能夠憑自己的名字衝出香港，成為國際知名的導演，是不少電影工作者的夢想。香港有不少導演遠赴荷李活掘金兼找尋夢想的成功例子，早年有吳宇森、林嶺東等，而近期的有劉偉強。
劉偉強憑拍商業片成名，一系列《古惑仔》、《無間道》、《頭文字D》令他成為警匪片及江湖片的代言人，聲名大噪之餘，票房亦大收。劉偉強去年便找來型男李察基爾（RichardGere）拍了一齣講述性侵犯的西片《TheFlock》，他的《無間道》更深受美國片商喜愛，並由名導馬田史高西斯（MartinScorsese）購下版權拍起美國版《TheDeparted》來。劉偉強亦是首位香港導演被邀請擔任導演，拍韓國片《雛菊》，並邀得韓國人氣偶像「野蠻女友」全智賢、鄭宇盛和李誠宰任主角。
做足準備工夫
談及為何會拍起韓片來，劉偉強日前在他觀塘的辦公室笑說：「有人搵咪拍囉。」對於成為首個被欽點拍攝韓片的香港導演，劉偉強半開玩笑道：「好咪名留青史，唔係咪遺臭萬年囉！」此訪問見報時，《雛菊》仍未上畫，票房如何仍是未知之數，但有理由相信以劉偉強一貫精打細算的準則，雖然這是部愛情片，但有齊所需的商業元素，收成應在他的預計之內。
問劉偉強拍慣警匪片和江湖片，處理愛情片種有否困難？他說：「我拍過愛情片，由黎明同張曼玉主演嘅《一見鍾情》就係例子。」提及今次同韓國演員合作的感覺，劉偉強坦言大家相處愉快，他說：「佢哋同香港、台灣、美國嘅演員都一樣，都係咁專業，不過韓國演員就比較專一，拍呢部戲就淨係拍呢部戲，所以時間多咗，我哋可以有時間圍讀劇本，大家多啲溝通，因為佢哋畀兩個月時間去拍呢部戲，中間唔會走去拍廣告或做其他嘢，係全心全意拍戲。」劉偉強續說：「好似我去荷蘭拍外景，我早成個幾月去睇景，又帶全智賢去佢戲入面嘅畫室視察環境，佢亦好勤力投入自己嘅角色，總之準備工夫一定要做得足。」
去美國學開會
去過美國拍西片，又拍過韓片，問劉偉強再拍港產片的心態可有改變？大導演笑說：「心態係冇變，只係大家工作嘅方法唔同，喺外國我學識嘅係開會，不停重複嘅工作會議，要習慣佢哋嘅開會文化，但我亦教佢哋香港style，我喺香港可能一個禮拜至開一次會，講吓有啲乜嘢，其他嘢我就交晒畀個副導演。可能我哋嘅轉數、處事方式，令佢哋好驚奇，好amazing，但你問我係咪學識外國制度嘅分工？我可以答你，基本上香港以前同𠵱家嘅電影係冇乜點變，我入行時喺邵氏分工都好細，一套戲可以有百幾組、五十組，但𠵱家因為要精簡架構，省略咗好多嘢，不過一樣有燈光、服裝等分工。」
李安剛憑《斷背山》（BrokebackMountain）成為首位獲得奧斯卡最佳導演的華人，問劉偉強可想跟李安一樣踏上奧斯卡的頒獎台呢？他笑說：「認識嘅李安係好腳踏實地，佢能夠成為奧斯卡最佳導演呢個歷程係好值得參考，對我哋呢啲後輩去荷李活係有借鏡作用，不過要攞獎呢樣嘢我冇諗，我只係想拍好每一部電影。」
