「我本身好鍾意買黑超，尤其係烏蠅鏡，屋企起碼有十幾副，因為覺得自己面形比較適合戴烏蠅鏡，而且副眼鏡大啲又可以遮多啲個樣。個人認為點都要有幾副傍吓身，唔同顏色嘅鏡片可以方便襯番唔同嘅衫。除咗黑超外，牛仔褲係我認為必備嘅衣着，揀牛仔褲最緊要係cutting啱自己。另外要睇布料洗水洗得靚唔靚，條褲着到殘殘舊舊嘅感覺會自然啲，至於條褲爛得嚟型唔型都好緊要。」
關智斌尖鞋扮乖
「今年流行尖頭鞋，再加上漆皮設計，好襯我一身斯文打扮，casual得嚟帶點隆重。呢對鞋係我託朋友喺日本買，平日我得閒就會上網，或者留意日本fashion雜誌，每次見到啱心水嘅產品，就會剪底再email畀日本做時裝嘅朋友，咁樣價錢會比水貨平啲，同埋較易買到心頭好。」
應昌佑自設型T
「因為我入行前喺Nike做過設計，所以大家一直keep住友好關係。呢件T恤仲係我臨走前有份參與設計嘅，所以好有紀念價值，以前喺Nike設計衫會plan定未來一年嘅服飾，所以呢件衫都係𠵱家先有得賣。其實我比較鍾意sporty啲，同埋有街頭feel嘅服飾，不過始終要襯番自己嘅身形先得。」
Juno金邊型鏡
「VISVIM呢個日本牌子初時只係出鞋，近來就出埋衫同褲，佢嘅賣點係啲用料，好似對鞋嘅料就係防水嘅。另外佢啲衫、褲就會有啲details位，好似我件T恤簡單得嚟，又會有條黃色帶點綴一吓。另外我好鍾意呢款LV眼鏡，我個人喜愛一啲大副眼鏡，同埋白色框襯金色邊，好搶眼。」
採訪、攝影：陳慧安、李珮洳、卓美娟、駱華齡、馬建華、林德雄
