何超儀可算是名人第二代中最反叛的一個，成功放下「何家淑女」標籤，投身演藝夢工場的她揚言比賭王父親何鴻燊更愛賭博，以命運作賭注都不願離場。超儀表示加入娛圈令她保留童真，最難忍家人吃飯都傾生意，她希望自己可以心地好，但深明心地好在現實社會很蝕底。 撰文：RitaLeung
何超儀有個非常有名的富爸爸，就是坐擁幾百億身家的賭王何鴻燊，她絕對是典型的名人第二代，但其人生軌迹卻有別於一般名人第二代的方程式，她放棄讀大學，返港做歌手、做演員，而姊姊超瓊、超鳳及超蕸在父親旗下的信德集團及澳門娛樂出任高層，弟弟猷龍成立新濠集團，成為新一代企業家，相比之下超儀絕對是反叛、火爆和破格。
家族經營賭博業，問超儀是否很喜歡賭博，她說：「我鍾意賭博，賭得比老竇仲大，𠵱家愈賭愈大，走唔到。我賭緊自己嘅時間、情、身軀、命運，全部都賭落去，會係一世嘅，亦都唔想收，因為太正經同現實太近，呢道火會收，甚至會怕發出嚟，所以我永遠都唔希望做生意。
最憎食飯傾生意
「做呢行可以容許自己有童真，容許自己發夢，因為我好頂唔順喺屋企食飯都係傾緊生意，覺得好悶、好現實。我希望自己可以心地好，真實喺社會上生存心地好會好蝕底。」
問超儀是否認同自己是家族中或名人第二代中的反叛先鋒？她笑說：「最反叛係踏出第一步入呢行，我真係衷心愛呢行，唔好講入呢行，嗰時唔入大學都係罪。老竇話呢個圈太複雜，佢話自己都應付唔到，好唔贊成，一係送我去青山，一係留喺度，最後大家姐撐我，將我嘅命運扭轉，如果唔係，可能我長大就係趙式明（趙世光女兒）。」
終得到家人認同
入行十年，超儀琢磨演技，近年亦得到認同，如兩年前憑電影《豪情》奪得金像獎最佳女配角獎；在《蝴蝶》中，她憑已婚同性戀教師的破格演出，○四年有份角逐威尼斯國際電影節「人道精神獎」與「國際影評人協會獎」，可算是捱出一點點成績。
問超儀的得與失，她笑說：「輸咗條腰同頸，甚至脊椎，贏就贏咗大家對我嘅肯定，呢啲係返學同社會上學唔到嘅嘢。學咗嘅就係藝術上有價值嘅修為，有冇修為嘅class，唔係淨係講緊有冇錢，有啲人好有錢都冇class，好低級。我學識提升人格，各方面都高級啲，自問喺呢行都冇出術，行得正企得正，多一份尊嚴。」
超儀表示在家中的地位亦有所改變，她說：「以前喺屋企大家心底都覺得大家係儍嘅，我有時都可以娛樂到佢哋，佢哋講嘢好makesense、好官腔，𠵱家我開始同佢哋傾到兩三句，佢哋都知道我做緊乜嘢。好似老竇都會同我講：『你部《蝴蝶》好犀利，畀隻碟我睇吓！』我好高興屋企人會理吓我。」
心中有火被撲熄
當眾人認為超儀依然好反叛，好有「火」，她本人則覺得是一種home-coming的蛻變，超儀說：「𠵱家會發覺以前啲火係無謂、冇用，以前係唔係都發（火），𠵱家冇咁多力發，儲埋啲火，個人都馴服晒，有必要先一次過咁發，費事輸埋精神，好大壓力、好辛苦。𠵱家知道就算有權表達心底嘅訊息，都唔係個個都想聽，所以要有一個小小嘅平台去溝通，發火都要有point！」
超儀所講的小小平台，就是近日忙於八月推出、東亞娛樂投資的唱片，她說：「兩年前自資出《何超》，係特登唔理個市場，最終個市場都冇理我。以前係一小撮聽眾，我相信我嘅音樂係可以闊啲。」
攝影：RickyChan
