講到《鋼鍊》！佢冒起可以話打破晒港、日動漫界，以機械人為主導嘅根深柢固傳統；記得對上一次同樣有全民效應動畫已可追溯至多年前的《新世紀》，但《鋼》以吸引世界觀，再加簡單以物易物嘅原始「等價交換」法則，就可以封為殿堂級作品，真係不得不寫個「服」字！《鋼鍊》劇場版DVD今個星期推出，並以「最終真結局」做號召，情況正如《新世紀》，大家就算明知係騙局，你都無法唔追埋最後呢個「補完計劃」！
記者、攝影：朱崇德
今次呢隻劇場版《鋼之鍊金術師：森巴拉的征服者》真係做得幾精美；一碟電影、一碟Bonus、10張明信卡、大大張海報，再加一本大家等咗好耐嘅「術語解說」特典，全書64頁解讀《鋼鍊》內容；電視版結局好多人仲睇得一頭霧水，今次有官方解讀整個世界觀，真係點可錯過！𠵱家《鋼鍊》限量雙碟特別版先行派街，據知遲一陣仲有單碟齋版推出，碟價約$90，旨在參與者值得等！
結局2年後兄弟再重逢？
電視版《鋼鍊》剛做完結局無耐，話說愛德華為救其弟，不惜以一命換一命，不過從此兩兄弟就分隔於現實及虛幻的鍊金術世界，睇到呢個結局心裏硬係有點戚戚然吧！今次《鋼鍊》劇場版，就是續寫電視版2年後的故事，得回肉身的艾爾雖然失去了作為盔甲人時期的記憶，不過心裏仍念念不忘捨身救己的哥哥，更不惜再一次使用禁斷的鍊成陣，穿越「門」的另一邊救回哥哥；至於愛德華，則身處德國希魔的動盪年代，估唔到透過一條傳說的巨蛇，竟能令現實中的人穿越到「門」的另一邊。
最少「開拖」劇場版電影
個人而言，《鋼鍊》電視版的結局都已去得相當盡吓！由9成的篇幅鋪排令人入信「等價交換」，及至最後再將它全盤推翻，話畀大家知一分耕耘並唔代表一定有一分收穫，直有醍醐灌頂的感覺，而且不完美的結局，亦令人有種細味的思想空間；相對今次劇場版的《鋼鍊》，在原結構上已經欠缺了「等價交換」的《鋼鍊》原始味道！加上劇中的中軸是以現實世界的愛德華做中心，須知他身處的世界是沒有鍊金術的現實世界，以劇場版電影嚟講，佢都可算是打破最少「開拖」紀錄！唯一開心的是能夠看見兄弟兩人再一次重遇，回看40多集電視版兩人支離破碎的日子，實在有種說不出的感動！
幕後人員解讀《鋼鍊》
睇動畫都係以日文較原汁原味！中文字幕配DDEX及dtsES靚音效，真係無乜投訴，再加埋有「無記」原裝配音做粵語DDEX，感覺就更完美更值得珍藏！至於Bonus碟，差不多有成大半都係電影預告片，初睇都有啲㷫㷫哋，好彩尾段原來有導演水島精二及監製大山良嘅專訪，並解說《鋼鍊》劇場版的背後含意，都叫可以一睇！
