昨日中午吃飯之後，行經東亞銀行總行「小商場」，忽然後面有人嗌，回頭一望，投資R是也。投資R人在裁縫店內，走入去，佢話揀緊布料做恤衫，師傅耐心解釋各種布料：「嗱，呢隻係Armani，呢隻係Boss，呢隻係BrooksBrothers……佢哋嘅恤衫，係用呢啲布料嘅。」布料全世界都有，事實上幾乎所有名牌成衣T恤，都係珠三角製衣廠製造嘅，香港紡織商人最優為之，故此香港裁縫識得買入同等質素嘅布料。但款式又如何？師傅打開一本好厚嘅日文男性時裝雜誌，內容幾乎全部係廣告，裏面有齊各種恤衫、西裝最新款式，任揀唔嬲，睇到左丁山心郁郁，想做番幾件恤衫。投資R係熟客，係咁意做番三件，話明要不配領帶嘅款式，價格又幾相宜噃，比去名店買名牌，平好多，想唔到投資R搵埋搵埋咁多錢，咁識得入筍貨。
投資R跟住要裁縫店改禮服褲，趕住用，問佢為何如此緊急，佢話：「星期四晚母校慶祝八百年校慶，在君悅開波，要着踢死兔。」邊間學校有八百年歷史咁耐，一諗就記得投資R係劍橋出身嘅CA（特許會計師），當然有資格參加，劍橋校友，香港多到極，有錢有面之人，多到數唔晒，淨係特區政府局長已有兩個，就係李國章、黃仁龍。李國寶國章兄弟加埋佢兩位嘅公子，全部劍橋畢業，又有首席法官李國能、新鴻基郭炳聯，可以講得係黃金陣容。劍橋大學唔乘機在香港籌款就笨咯，起碼八千萬港元啦，八億都唔嫌多，籌八百萬就未免睇小啲劍橋校友咯。當今劍橋大學校長AlisonRichard女士曾任耶魯大學Provost（相當於副校長，管錢管人），識晒美國大學籌款嘅招式，冇理由唔乘慶祝八百年校慶之便，打香港校友心口啫。
諗真啲，八百年係好長時間，一二○六年之時，世界係乜嘢一回事？翻查資料，當年係蒙古太祖元年（成吉思汗即位），南宋風雨飄搖之時。歷史人物俱往矣，浪淘盡千古風流，獨是大學機構可以屹立不倒，代代有人才出，辦教育先至真正係一個國家民族嘅千年大計。