林子祥（阿Lam）同葉蒨文（沙麗）呢一對樂壇夫妻嘅關係，都算夠晒詭秘，佢哋一時糖黐豆，一時又水溝油，除咗偶爾一齊開工以外，平日都係各有各生活，阿Lam就孤獨打高爾夫球，沙麗就鍾意同班男波友打羽毛球，加上阿Lam前妻吳正元之前又接受周刊訪問，大爆沙麗有好多男性朋友，佢兩個真係好日都唔約埋食餐飯。
但沙麗日前就罕有咁同阿Lam去咗跑馬地彭慶記食家撐枱腳，咁都俾關仁撞到。
帶頭衝上車
雖則沙麗年過四十，但都有心機扮靚㗎，見佢當晚特登喺個頭度整色整水，加咗幾撮毛，一出酒家就成支箭咁衝上車，而阿Lam就例牌冇乜表情，雙手插袋、滋油淡定咁尾隨上車，節奏同沙麗真係差天共地，佢哋兩個夜晚七點幾已經食完飯，跟住司機就送咗佢哋返位於司徒拔道嘅豪宅喇。
後尾彭慶記嘅老細同關仁傾開，佢話阿Lam兩公婆喺六點幾已經嚟到開餐，但驚撞到記者，所以特登將部車停到九丈遠，點知都係俾人發現，但關仁就真係唔多明嘞，其實被人見到又點呢？兩公婆食餐飯好平常啫，咁都要避，摸不着頭腦。
Textby關仁
