「停一停、諗一諗」，是發人深省嘅一句宣傳語。最近網上流傳不少動物被虐待的片段，引起社會上各界關注，政府更因此為愛護動物及防止動物被遺棄大做宣傳。復活節又到，又成為購買兔仔嘅高峯期，但又有幾多人真正喜歡牠們？了解自己是否真正適合養兔仔？PetsCafe最近就收留了不少被遺棄嘅兔仔，希望真正愛錫兔仔嘅人士可以為牠們找一個溫暖嘅家。
記者：許維雅 攝影：伍慶泉
五小強等領養
PetsCafe是兔仔專門店，會員經常來這裏為兔仔剪毛洗白白。不過Cafe亦收到不少會員遺棄他們嘅兔仔，於是希望藉着復活節假期來臨，呼籲有心人唔好買兔仔，可以將這群可憐兔帶返屋企，給牠們一個溫暖嘅安樂窩。當中有不同品種嘅兔仔，個個精靈可愛，年紀全是1歲至2歲左右，如果有打算買兔仔嘅好心人，只要交$20的入會費，就可以免費帶牠們返屋企。Cafe今次派出5位被遺棄嘅小兔做代表，讓大家見識一下這群待領兔仔有幾可愛。
待領1號仔：兔B
品種：賓尼兔 性別：女
歲數：1歲（2005年3月出生）
特徵：活潑好動，愛吃，懂得去廁所。
被遺棄原因：會員因為搬新屋，新屋比以前細而被迫放棄。
待領2號仔：吉吉
品種：賓尼兔 性別：男
歲數：1歲（2005年2月出生）
特徵：最鍾意食嘢，喜歡被人摸頭仔，愛吃草磚。
被遺棄原因：會員在筲箕灣街上發現吉吉，但遭家人反對，被迫放棄。
待領3號仔：熊貓
品種：混種海棠兔 性別：男
歲數：1歲半
特徵：好聰明，喜歡跟小朋友玩，愛吃，已懂得去廁所。
被遺棄原因：會員因家中有BB出世，BB氣管炎日漸嚴重，所以被迫放棄熊貓。
待領4號仔：小雪
品種：獅子兔 性別：女
歲數：1歲3個月
特徵：最肥一隻，又乖又可愛，剛剛到埗一星期。
被遺棄原因：會員因要到外國讀書，未能帶小雪同行。
待領5號仔：小春
品種：侏儒兔 性別：男
歲數：1歲
特徵：走得好快、十分活潑，全身均是野兔色短毛。
被遺棄原因：會員一直愛錫小春，可惜家中老人家強烈反對，被迫放棄。
三分鐘熱度
嘩！好得意呀！買返屋企先！但善忘嘅香港人大多數都是三分鐘熱度，永遠都有三千萬個藉口遺棄牠們。復活節臨近，必定又有很多突然間醒起兔仔好可愛嘅「愛心爆棚香港人」買兔仔，不過最慘係好多人眼中兔仔比起貓貓狗狗身份更低，更容易一句唔鍾意就唔養。
今次記者到訪嘅PetsCafe，全部棄兔主人給他們的理由都十分牽強：家人反對？買嗰陣時屋企人都知啦！搬屋？乜兔仔好大隻咩！BB出世？買嗰陣時冇諗過生BB咩！但PetsCafe就全部接受會員放棄，收留這些棄兔。其實，我又好唔明喇，咁樣咪變相縱容他們養成放棄寵物嘅習慣？
為食兔超失控
不過講真，今次同五小強相處，我才發現養兔仔真係唔同養貓狗，因為牠們與人溝通交流的能力較低，淨係識得不停食食食。拍攝期間，牠們都十分失控，三雄二雌一出籠唔係打交、唔係搶嘢食，竟然喺度喪搞！搞到我同攝影師哥哥都無眼睇！而且佢哋無論着衫、影大合照、套兔繩都十分困難，成日不停掙扎想咬人，所以話，與兔仔溝通嘅耐性真係要比貓狗更多。不過養動物永遠都係買就易、養就難，愛心唔係得把口，一時衝動只會害死牠們。
兔仔小玩意
好多人唔喜歡養兔仔，覺得唔可以同牠們玩，又唔可以帶出街，但其實寵物店卻有不少兔仔玩意。
1.好多人都會帶兔仔出街散步，有些較活潑的會周圍亂跳，寵物店有兔仔繩套住牠們落地行。
2.狗仔有衫仔扮靚靚，原來兔仔亦有不少可愛衫仔，不過幫牠們着時要小心，因為牠們反抗力都幾大，最好冬天才給牠們穿着。
3.雖然兔仔唔可以跟狗仔一樣教牠們太多動作，但用一些乾糧小食引誘牠們，牠們亦可以企起身同你玩。
4.兔仔無時無刻都要磨牙，可以買一些磨牙玩具給牠們玩，牠們有時更會用來磨下巴止癢。
5.兔仔比較怕羞，喜歡捐窿捐罅玩，主人可以跟牠們玩捉迷藏以增加溝通。
兔仔用品裝備
好多人對照顧兔仔的知識一知半解，其實照顧兔仔都有好多不同用品及食物。
1.英國獸醫糧
英國No.1銷量糧食，無防腐劑無人造色素，不同年紀應給不同種類糧食，每日2餐。$106/包
2.乾草
除有磨牙作用之外，亦有高纖維幫助腸部蠕動，排出腸內毛髮，可以無限量給牠們食。$88/包
3.生果乾
用新鮮生果製成，同樣可以幫助排出腸內毛髮，增加營養。特價$25/包
4.香草卷
有些兔仔唔喜歡食乾草，香草卷有香味吸引牠們，保持充足纖維給牠們。$28/包
5.膠廁所
用膠比用鐵好，鐵生銹後容易令兔仔腳受傷，而且牠們很容易把鐵銹吃落肚。$48
6.木粒
除有吸味作用之外，濕水後會散開避免兔仔吃落肚。$142/15L
7.水果小食
水果小食內加有麥皮，十分有營養，可以溝入正糧內一同餵飼。$52/包
PetsCafe
地址：觀塘開源道77號業發工業中心一期14樓B3室
電話：90333433
網址： http://www.pets-cafe.com
你係咪真係可以照顧牠們？
1.養兔仔需要給牠們一個固定居所，所以必須準備一個適合的籠給牠們。如果經常轉換環境，更加要問清楚家人會否接納。
2.兔仔壽命約五至八年，必須要有心理準備在養兔期間有小孩子出世。
3.領養回來的兔因被人遺棄，所以性格比較孤僻，照顧牠們要加倍愛心。
4.兔仔是十分貪吃的小動物，無時無刻都不停食，若牠們欠胃口代表牠們生病了。
5.轉天氣時兔仔會換毛，亦是牠們的發情期，所以必須將雌雄兔仔分開。
6.兔仔的牙會不停長，所以必須準備一些磨牙食品或玩具給牠們。
7.長毛兔需1個月左右為牠們剪1次毛和指甲，每次約$260。