江欣燕同江欣慈兩姊妹真係好感情，成日約埋行街食飯，早幾日江氏姊妹花又出擊，不約而同戴cap帽、着V領背心配三個骨褲、外披連帽外套，一齊喺銅鑼灣shopping。江欣燕假假哋都叫做明星，呢期做纖體代言人亦撈唔少，不過買嘢居然打死狗講價，真係睇佢唔出喎！
飲嘢傾密偈
上個禮拜二晚十點零鐘，江氏姊妹花約埋到世貿中心逛街，佢兩個雖然冇化妝，但都冇乜走樣，皮膚亦保養得唔錯。兩姊妹行到攰，於是入咗商場嘅Mix果汁店歇一歇。家姐江欣燕買咗杯西瓜汁，江欣慈就買咗杯橙汁，之後就齊齊坐咗喺落地玻璃位度傾下心事。
關仁聽見江欣燕同佢細妹係咁講購物經，但佢愈講愈唔忿氣，仲同細妹呻：「頭先對鞋都幾好嘅，但試嘅時候有啲夾腳，又唔肯減畀我……」嘩！江欣燕鍾意對鞋但又嫌夾腳，咁咪唔好買囉，關減價乜嘢事呢？唔通有折頭啲腳趾就唔識痛？
Textby關仁
