Comeon!夏：無風玩Carveboard出發吧！

啱啱踏入4月已經好熱，好難想像之後嘅夏天點樣過。消暑方法有二，一，漚喺屋企歎冷氣；二，飛出沙灘與水同樂。想滑浪？𠵱家仲風細，要玩就玩全新X-GameCarveboard，Carveboard無錯係喺陸地上玩，但就絕對同水有關，只要有滑浪根底，加埋X-Game專家Ken、王合喜教路，唔怕痛仆多兩三次，保證你15分鐘學成。
記者：許維雅
攝影：陳盛臣
模特兒：Natalie、Bianca
服裝提供：X-Game

Carveboard分2種

同Snowboard一樣，滑浪經常受天氣影響，無雪玩唔到Snowboard，無浪就玩唔到滑水。Carveboard呢種最新引入香港嘅X-Game，就係美國滑水發燒友針對天氣問題而發明，玩嘅動作同原理同滑浪一樣，分別只係Carveboard喺陸地上玩，無水一樣掂。Carveboard形狀同滑板好相似，板分2種，一，Carveboard，轆好似車軚一樣要Pump氣但可避震；二，Carvestik，轆用硬膠造，兩者蹺妙皆在滾軸設計上嘅彈弓，板左右兩側可以上下郁動，踩板碇彎嗰陣，板身最勁可以同地面形成45度角。同滑水一樣，唔同磅數嘅人要踩唔同大細嘅板，由於由美國引入，所以暫時所有板都係喺美國生產。
其實香港唔少滑浪發燒友都要捱凍玩浪，「XGame」老闆Ken話：「香港9月至3月先至係滑浪季節，香港夏天風向唔適合滑浪，浪太細好難起水。幾年前我開始留意美國Carveboard呢種可以代替滑浪嘅X-Game，不過之前板嘅設計仲未成熟，等到今年先正式引入香港。」Ken暫時引入TwinStik同LongStik兩款板，方便在只要一塊平地或一段斜路就何時何地都玩得。

■http://www.
carveboardsports.com有網上Video，展示鬼仔玩板雄姿。

解構

■TwinStik（33.5×8.5吋）板身雙向無分頭尾，板身較細，$2,200。

■板底有彈弓，板左右兩側可上下郁動。

■LongStik（39×10吋）板身單向尖頭圓尾，板身較大，$2,400

■滾轆內圓周較外圓周大，腳踭向後一踏，外轆立刻貼地方便掟彎。

未學花式先學點跌

15分鐘學識就學曉，堅定流？堅！只要學曉點企、搵到重心方向、雙腳企啱位就好容易上手，我無滑浪根底親身踩板試兩腳真係15分鐘都舞得掂。當然，要玩到好似Ken同王合喜咁Pro咁快就真係要有番咁上下滑浪底子，Ken畀貼士：「玩多幾次一定學識，不過先要學識點跌，一跌就要碌落地卸力，如果唔係向後一滑就好容易整親腰骨同後腦，到掌握到重心同速度，咁就可以大玩花式嘞。」

■雙腳擺放喺板頭板尾稍稍向上翹起嘅位置，大力啲嗰隻腳放前。

■重心微微向前，雙膝唔好分太開，微微向內更易保持平衡。

■加速原理同滑浪一樣，利用腰力向左右兩邊擺，所以一定減到肥，減速就同Snowboard原理一樣，後腳輕輕向前推。

玩家話Easy

售賣點
XGame（23667103）
地址：尖沙嘴漆咸道南79號中國五礦大廈1樓

「第一次試玩已經覺得好好玩，可能有滑浪底子比較易上手。」

「愈玩愈興奮，無諗過咁易學，係有少少驚跌啫。」

「好容易玩，好有速度感。之前喺外國都未見過呢塊板，好容易控制。」

沙灘友出籠！

慢流版水上電單車

年年夏天去海灘，除昅女外一定望吓有乜嘢又新又大又誇張嘅水泡，往年甚麼椰樹、薄餅、八爪魚都出齊，今年為大家率先吹氣水上電單車。水上用品公司「ASTONE」眼見港人十分熱愛玩水上電單車，但每次小朋友都只有得望無得玩，於是就設計出專為小朋友而設嘅吹氣水上電單車，可能始終屬於吹氣玩具，所以大人玩的話一定會嫌速度慢，同埋每次叉電後只可玩1小時左右，幾煩吓！不過騎住架吹氣水上電單車喺海上玩飄移都幾搞笑。