戴志偉金句：「足球係我朋友。」成套卡通都提倡快樂足球，我諗新一代球王細哨一定有睇過《足球小將》，贏波輸波都永遠笑笑口。Nike就係睇中細哨識笑，搵佢拍咗段廣告提倡快樂足球，點知廣告一出即成波友熱話，麥花臣老波骨個個質疑：「係咪搵個似朗拿甸奴嘅細路拍㗎咋？」同之前連中N次門楣嘅廣告一樣，Nike方面無明確表示段片真定假，不過我信條片係堅嘅，斷估世界上都好難搵到有個同朗拿甸奴一樣咁醜樣嘅細路仔啩？
記者：羅灝汶
攝影：譚盈傑
四萬咁口笑住踢
食正世盃熱，Nike今次搵唔同球星拍「快樂」、「技術」、「熱誠」、「團隊精神」同「榮耀」5段廣告片，宣傳「踢出漂亮」精神，打頭陣有細哨「快樂篇」，廣告由簡東拿做旁白，然後出現細路版細哨，成條短片成人版同細路版細哨不斷穿插出現，球王個個Shot都四萬咁口，其過份好波令麥花臣一眾老波骨質疑。（網址： http://www.nikefootball.com.hk）
李力持：懶理堅定流！
老例問番Nike廣告真定假，Nike咁回應：「球星好波，當然做得到。」我問：「咁即係真定假啫？有無剪接啫？」「我哋之前推出朗拿甸奴射門楣嗰個廣告，好多人都向我哋查詢堅定流，我哋一向都係咁答覆──以球星嘅水準，一定無難度，今次細路版朗拿甸奴都唔例外，球王細個當然好好波啦。」唔忿氣再問李力持，佢話：「我睇過Nike一系列廣告，識得用球星去包裝，好有趣味同創意。我諗成條片應該半真半假，因為球星唔係專業演員，佢哋邊得閒抽時間拍廣告吖，今次俾佢哋搵到細路版朗拿甸奴呢條片，主旨好突出，睇幾多次都唔會厭，有無加工我都睇唔出，不過睇得開心就夠啦，懶理佢堅定流吖。」
Keyman：我信係堅！
講波佬同現役球員點睇？Keyman話：「我覺得段片一定堅，入面嘅Skill細路仔絕對做得到，不過朗拿甸奴特別厲害咁解啫，現代足球唔會咁功利同個人主意，條片反映到佢𠵱家踢波嘅技術同取向，其實細路仔踢波有時仲有趣過大人，Sell快樂足球主旨明確，搵成日笑嘅朗拿甸奴做主角非常正確。」丘健威咁話：「原來佢細個已經好好波，踢嘅絕對係快樂足球。我記得細哨講過佢細個最鍾意研究花式盤球，難得到𠵱家都可以運用得咁好，我哋成班球員Friend都傾過呢段片，唔信係假囉。」
阿伯話係流
