復活節就快到，商場大業主都催谷宣傳，呢期商場營業額係報道焦點，新地嘅將軍澳東港城商場，噚日搞活動，都準備定呢方面嘅料，答記者問題。
面積40萬呎有近100間舖嘅東港城商場，今年第一季生意額達3億，最多係1月嘅1.2億，3月因為冇節日就差啲，得8600萬；而4月有復活節4日長假，新地代理租務部副總經理鍾秀蓮預期，生額可到1億。
今年東港城商場會有26個租客約滿，一半換咗新租客，引入高格調品牌同特色食肆。租金就加20%以上，原因係呢批舖位租約喺03年沙士期間簽嘅，租值偏低。
鍾秀蓮透露，商場已全部租出，而且重有輪候名單㖭。
為加強競爭力，個商會花500萬翻新，包括洗手間同加裝6部LCD大電視，等商場有活動時，市民都可以透過大電視睇到台前搞緊乜。