公益金舊年籌款數目創新高，今年就梗喺想再進一步，除咗四日內連搞兩個活動催谷宣傳之外，喺嘉賓陣容方面，都出咗唔少力，好似噚日嘅○五年「便服日」頒獎活動咁，就出動到滙豐鄭海泉、恒生柯清輝、肥龍許仕仁同埋九巴陳祖澤呢個「猛男四人組」做主禮及嘉賓，相對起前幾日嘅「公子四人幫」，真係一啲都唔輸蝕。
身兼「便服日」籌委主席嘅鄭大班，四點鬆啲就喺現場主持大局，事關頒獎禮之前，仲有個支票移交活動，大班笑騎騎企足成粒鐘收支票，仲做埋人肉布景板，同捐款者合照，中場小休諗住可以唞下，再撐埋下場，又有小朋友搵佢同陳祖澤影合相，咁啱遇着個「唔熟性」嘅攝記哥哥，竟然叫大班踎低，八方睇見都戥佢辛苦。
頒到最高籌款獎個陣，鄭大班索性自己上埋台領獎，仲笑到見牙唔見眼，梗係，今次已經係佢哋連續十三年冧莊，又抵佢開心兼牙擦嘅。
傳真︰2623-9278
電郵︰[email protected]