大概十年前，跟朋友在蘭桂坊吹水，大家想當年之時，我以為好醒猛話自己最鍾意的電視片集，係《星空奇遇》（StarTrek），雖然係黑白片，不過都好有太空Feel。聽到班朋友一嚿雲。黑白？彩色嘅噃！係咩？乜部片集彩色㗎？先至記得當年就算香港電視開始咗彩色播放，我都遲咗幾年至有彩電，係我架電視黑白機啫。《星空奇遇》個片頭，當年真係識背，除咗個有小小肚腩嘅葛克隊長之外，更記得隻耳仔長長哋、有啲怪的冼樸。一個代表好有理性，好有邏輯，外冷內熱的角色，因為這其實就是現代人心目中的角色：講理性而又有感情的人！無論是哪個年代或者2006年4月，這已經成為所謂現代化的理型。不過，講真，唔係那對耳仔，冼樸邊有咁多人記得吖！後來我至知，原來對耳仔係《猿人襲地球》（PlanetoftheApes）（當然唔係添布頓那部，而係原始版）那位金像獎最佳化妝JohnChambers所造。件老Tee係猿人加冼樸個樣，算係心目中對佢嘅支持。不過件衫好白，我買咗成個幾星期都唔捨得着，驚整污糟。至於兩套DVD，都買咗好耐咯，講真，第一個Season都未睇完，係買嚟擺多啲！