截咗標成兩個禮拜嘅九鐵大圍車廠項目，仲未開標，發展商等到頸都長。噚日就有神秘人向各大報館爆料，話個項目已經內定批畀長實，唔知堅定流。
係咪長實要等開標至有分曉，但九鐵消息人士同蘭西講，話九鐵自從兵變之後人心惶惶，管理層個個驚孭鑊，遲遲唔敢下決定，搞到大圍車廠項目開標一拖再拖。本來話上個禮拜一管理局開會後揭盅，但竟然神化到話因為當日太多議程要討論，未傾到呢單已經夠鐘散會，要擇日再傾，到噚日市傳會開標，最終又冇影。個項目大嗱嗱值兩百億，重要性唔係咁低啩？
若果九鐵一早開標，就唔會搞到有咁嘅傳言。𠵱家除非唔係批畀長實，否則就有排講嘞。
蘭西記得，以前政府招標地皮都俾人鬧過開標遲，後尾試過即日公布結果㖭，認真快手。
講開被指內定嘅長實，佢哋一向入標都好神秘，次次都兵分幾路，出動神秘人之餘，又派員到場視察，即時報料。最騎呢係搵人扮記者，帶晒簿同筆，去截標現場向真正嘅記者收料，以求攞到第一手現場消息，真係服咗佢。
電郵地址：[email protected]
