上期提到日本雜誌行Styling過份有性格，明明個Model樣衰騎呢都照型可也，點知今期5月號《BOOM》仲嚇人，一向我都幾喜歡Rebirth呢個品牌，款式簡單得嚟有型有味道，Cutting正質料靚，點知今期《BOOM》介紹Rebirth新裝嘅Styling突然貞子上身，長頭髮男Model竟然頭髮遮面，擺出一個超HeaPose，完全影響晒成個牌子形象，其實整個版面個Tone都好靚，灰黃顏色配合版面設計個Mood幾好，硬係唔明點解要行貞子Styling。
香港記者其實壓力好大，周不時都會有讀者投訴、PR同編輯詐型，莫講整輯咁激嘅Styling相，就連一個價錢都唔可以錯，日本記者對自己充滿自信嘅程度實在有點走火入魔。想深一層，美與不美好多時都可以好主觀，最終目的都係要輯相引起讀者注意，我覺得他們已經達到目的。今期《BOOM》都有Feature值得一睇，上次介紹過幾個HeadPorter新雙面袋，今期終於有齊貨可以慢慢睇喇！
