雖然我唔懂日文，之不過我每個月都睇不少日本的汽車書刊，皆因佢哋新車資訊夠快又詳細，仲有不少香港人熟識的知名賽車手的試車報告，憑住字裏行間的漢字，都會明白到佢哋啲試後感受。就好似今期4月號的《XaCar》咁，本書前面有大篇幅彩頁介紹多款新車，當中仲有我偶像土屋圭市，實地測試鈴木最新的SwiftSportSupercharger概念車；部車雖然無乜機會到港，但係土屋圭市試車，又點可以唔睇呢！想不到加入Supercharger機械式增壓器的SwiftSport，馬力輸出可以由原來125匹急升至155匹咁多，連帶扭力更由原有的15.1kgm調升至18.0kgm，引擎頭、中、尾三段的表現平均，文章內容更將呢部SwiftSportSupercharger概念車，媲美現今MiniCooperS，睇完真係好希望有咁嘅機會，睇到呢兩部被形容為同級火併小跑車的實地較量。
無頂林寶GallardoSpyder率先有得睇
海外實地試車報告至吸引筆者的目光，是有望今個月底又或者下個月初，快將抵港的林寶堅尼GallardoSpyder響意大利的試車實況，呢部新一代SuperCar輸出有520匹，新車加入埋一個全自動的電摺軟頂，原來開咗篷的林寶堅尼Gallardo跑車又真係好型仔喎！筆者今趟都係第一次睇到無咗個頂的林寶響公路飛馳的雄姿。
記者：陳偉林
