廖啟智與太太陳敏兒的五歲幼子文諾，與血癌苦戰三年後，在大前日凌晨因急性肺炎病逝。智叔昨日談到愛子離世時情緒已回復平靜，認為文諾的離開，是神的恩典。獲提名金像獎男配角的智叔，今晚仍堅持出席頒獎禮，以示對大會的尊重。
廖啟智與陳敏兒的三子文諾，○三年七月不幸患上血癌，去年底文諾接受臍帶血移植手術後，病情一直反覆，至周二晚文諾度過他最後一個兒童節後，於本月五日（大前日）凌晨一時十五分病逝，年僅五歲。
急性肺炎
入院後一小時不治
昨日智叔接受本報電話訪問，在談到孻仔文諾病逝時，他語氣顯得十分平靜：「係呀，囝囝四月五號凌晨一點十五分離開，返咗天國。四月四號嗰晚，我同敏兒同佢食完飯之後，同佢遊車河，通常我哋食完飯之後冇乜嘢做，都會同啲小朋友遊吓車河，嗰日遊完車河之後返到屋企，見佢有啲氣喘，於是十二點幾我就同太太送佢去沙田威爾斯醫院，等佢吸吓氧氣，點知一個鐘頭之後，佢就離開咗，仲有兩個月佢就六歲啦。其實換完臍帶血之後，情況一路向好，但始終抵抗力好差，佢離開嘅時候，係急性肺炎，所以走得好突然，由彌留到離開都係一個鐘頭左右。」
智叔稍感安慰的是文諾離開時十分平靜，完全沒半點痛苦，他說：「佢走嘅時候，我哋成家人都陪住佢，我同太太一人拖住佢一隻手唱住詩歌，兩個哥哥就喺電話側邊（指家中電話旁），佢嘴角一路都係微笑緊……佢離開得好平安好平靜。」
先行一步
父子他日天國相見
兒子的離世，定對智叔和敏兒帶來悲痛傷感，但智叔一家五口也信奉基督教，他們深信文諾只是先行一步到天國，將來定有機會見面。問到此刻心情如何時，智叔說：「作為父母，梗係會傷心難過㗎啦，但我哋覺得佢嘅離開係神嘅恩典，我同太太好快就pickup番，以平常心面對。其實呢三年治療過程中，我哋同囝囝好close，一啲都唔覺佢走咗，我哋知道將來一定會同佢再見面，好似我二仔都同我講，話：『你就好啦，你最快見到佢，因為呢度最老係你。』」
有關文諾的身後事，智叔說：「火化之後，我哋會喺呢個月二十二號下晝兩點，喺九龍城浸信會幫囝囝舉行安息禮拜，太太呢幾日為咗呢件事都好頻撲。」
強忍傷痛
出席金像獎頒獎禮
今晚舉行香港電影金像獎頒獎典禮，原以為憑《殺破狼》一片角逐最佳男配角的智叔，會因為飽受喪子之痛而缺席，但智叔卻說：「我一定會去，人哋提名我、尊重我，我亦都要尊重番人，尊重大會。我唔敢話自己做得好好，但我對自己演出亦有一定信心，不過，無論有冇獎攞都好，我都一定出席以示支持。」
採訪：戴彩煥
