下個禮拜係復活節又有假放，同班朋友一早計劃去菲律賓潛水，機票酒店Book好晒喇，弊！無潛水相機點算？之但係平時唔多機會用，特登為旅行而買絕對唔化算，好在坊間有舖頭提供呢類器材租借服務，唔使重本投資慳一大筆！
記者：招佩珊
攝影：伍慶泉、何家亮
模特兒：Winnie@Salvador
趁假期興之所至去潛水，一年頂多去一兩次，唔好話買部潛水相機，拎自己部DC仔配個潛水相機殼要成千五蚊都覺得嘥，好似我哋旨在有部機落到水影吓Snapshot，租機、租殼或機連殼一齊租就較實際。例如提供數碼相機租借服務的租機易，租借日數由2日起至15日，以備1.5米防水功能的SONYDSC-U60為例，租2日$35，每日平均$17.5，或者淨租一個40米潛水機殼約每日$27.5，去一個4日Trip租部U60唔使一百，抵玩！另外亦有DC連殼租用套餐，靈活性高，不妨計吓點租先至最着數！租借時須以現金支付按金，預約租機時先付租金，到取機時就畀埋按金。
相機連防水殼$50有交易
租機易負責人Ronno話潛水以外的時間都會影吓相，建議租DC另加防水殼，皆因細細部的防水相機像素同功能，始終唔及普通DC咁好。舖頭提供兩款防水殼，若然係浮潛或徒手潛水，用3米防水殼就夠，假如係揹氧氣樽潛落十幾米深，就要用40米防水殼。
最Hit租借榜
第1位CanonIXUS750〔連40米防水殼〕
IXUS750係700的升級版，除3倍光學變焦外，開機只需0.8秒便可拍攝，差不多一按Power就可影相；備有DIGIC II極速數碼影像處理器，能更快對焦、測光及高速存檔，有效像素有710萬，同700最大分別係備有2.5”大芒。
第2位CanonIXUSi5〔連3米防水殼〕
IXUSi5出名機身輕巧，僅重100g，稱得上係又輕又薄的袋中機，500萬像素足夠輸出A4Size相片；i5提升至9點人工智能自動對焦系統，對焦範圍更廣更準吽C
第3位SONYDSC-U60
U60有效水深為1.5米，針對水底拍攝的水底白平衡功能，可避免相片出現偏藍現象，屏幕經過改良，陽光底下亦非常清晰；直立式機身設計勝在手感極佳，只重149g夠輕，單手操作都無問題，唯獨像素只有200萬。
租機貼士
1.最好預約租機，大概出發前7日，特別是假期同節日旺季。
2.租前檢查操作功能，點算清楚跟機配件數目，確保帶走時無遺漏。
3.用後有些少刮花，通常店舖都不會要求賠償；但太大的損毀，就要賠上按金。
4.最好買份旅遊保險，若租借的器材有遺失，都可以分擔賠償金額。
租殼驗膠邊保防水
若然自己有部DC仔，可以淨租防水殼，店內主要提供適用於SONY同Canon部份型號的防水殼。好似SONYDC專用40米防水殼，可供T、W及S系使用。
後備電池要傍身
租機時會有齊原裝全套配件如充電器、記憶卡同電池，但一枚電池未必夠用，萬一中途電池無電或壞電，都有後備頂上。店舖亦有記憶卡可以租借，多張卡傍身影相唔使就住就住。或者索性租個DigitalWallet，影滿張記憶卡就過相，當做有個Backup都好，唔怕無晒啲相，成班朋友租一個40GBDigitalWallet夠晒用。
電池：包括常用相機品牌如SONY、Canon、Nikon等，每枚租金由$10/2日起，按金$100。
記憶卡：有齊各款常用記憶卡，租金$8/2日起，按金$50起。
DigitalWallet：16In1DigitalWallet按金$800，租金由$40/2日起。
潛水影相有技巧
1.先將配件處理妥當，如Format記憶卡、充滿電池等，相片解像度亦毋須調校太高，盡量減少開合防水殼次數之餘，又可避免影影吓要上水補給咁麻煩。
2.由於在水裏難以固定身體，所以快門及ISO亦應盡量調高，切忌在自動模式底下，逼令DC自我選擇慢快門嚟拍攝，否則乜嘢防震都幫你唔到。
3.就算水底幾清，始終透光率不及陸地上嘅空氣，所以微距掣（花形Icon）及遠景掣（山形Icon）要按需要不時轉換，絕不可能一個焦距走天涯。
4.事後清潔防水殼，應盡量風乾，切勿靠直射太陽嚟曬乾，免致防水殼膠邊出現硬化，增加入水危險度。
租機易（35210097）
地址：旺角花園街2號好景商業中心2樓57號舖
網址： http://www.cybertray.com