任達華從影超過三十年，拍過很多不同種類的電影，亦曾演過不同類型的角色，問他最喜歡哪三部電影？他選了《俠盜高飛》、《PTU》和《黑社會》。
《俠盜高飛》內斂斷背男
「我喺套戲裏面扮基佬，好斷背山，因為扮男同志呢類角色唔可以太露，但又要發揮到佢嘅性格，所以演出時要做好多工夫，要有好多唔同層面嘅表達，我又好鍾意個角色嘅外形。呢套戲嘅導演林嶺東好好，同佢合作好夾得嚟！」
《PTU》著警服勁型
「呢套戲裏面我扮演一名PTU成員，我好鍾意自己着警服嘅造型，都幾有型。呢個角色畀我好大演戲嘅空間，我好多場戲都有發揮機會，尤其領導下屬嘅幾場戲，大家戲內戲外都夾得到，相處融洽，絕對可以充份發揮拍電影嘅團隊精神。加上呢套戲嘅題材好正，我認為呢類戲種擺一百年再拎番出嚟睇，都唔會厭唔會out，好希望將來可以再拍以PTU做題材嘅戲。」
《黑社會》奸得有層次
「我扮演嘅阿樂表面友善，其實奸到出汁，角色性格好有層次，佢除咗要應付來自社團各方嘅壓力，又要面對一班老叔父，好多內心戲可以發揮。套戲我最鍾意嘅一幕係知道自己攞到龍頭棍，同個仔喺屋企食火鍋時，特登叫個仔去拎支啤酒慶祝吓，呢場戲本來可以表達長啲，但導演冇刻意，一切點到即止。我認為《黑》片同《PTU》一樣，二百年後睇番都會歷久常新。」
