港交所今個月二十六號會舉行股東會，除咗邊個會接李業廣個主席位，另一值得留意嘅係董事選舉，𠵱家七國咁亂，除咗小賭王何猷龍已經表態會角逐，最新消息係思匯政策研究所行政總監陸恭蕙亦參選，今次佢會拍住「股壇長毛」DavidWebb一齊選。
DavidWebb較早前揭發警監會泄露投訴人資料，連港聞版都識佢，但未必幫到佢選港交所，因為始終係財經界嘅事。今次港交所有兩個董事位要重選，兩位現任董事DavidWebb同經紀代表李佐雄話咗想連任，但由於股壇長毛聲氣多多，有啲經紀好唔妥佢，於是想拉佢落馬，聽講部份經紀支持何猷龍同董事學會主席許浩明參戰，𠵱家計落有五個人爭兩個位，到時戰況應該幾好睇。
傳真︰2623-9278
電郵︰[email protected]