尹子維大前晚喺alive慶功宴同老友連凱老婆Amanda又啜又攬，搞到連凱塊面黑過鑊底。攬完人妻後，尹子維又可以若無其事，前晚如常夜蒲中環，仲約埋早排夾埋搞不和新聞嘅吳彥祖同女友LisaS.成班friend一齊蒲吧劈酒，但現場就未見連凱出現，唔使講都知尹子維唔好意思約連凱去蒲喇！
等車狂𢱑頭
前晚尹子維同吳彥祖成班人去咗蘇豪區EMPIRELOUNGE遣興，到半夜十二點左右，吳彥祖同LisaS.手拖手先行離開，再隔咗約四十五分鐘，尹子維先同五男一女圈外友人離場。呢排搞浪子形象嘅尹子維，蓄兩撇雞鬍鬚同留長頭髮，但感覺就似喱啡多過不羈，當時佢同班friend行落老蘭，大家企喺街頭準備上的士，佢係咁狂撥頭髮，之後至同一男一女上車。
尹子維上的士後見到有記者影相，即時笑晒，特登擘大口扮鬼臉，又舉V字勝利手勢，極之風騷，簡直將攬人妻事件完全拋諸腦後。能夠玩時忘形，玩後忘情，尹子維都好好嘢啫！
