任達華在圈中人緣甚佳，他表示今日的成就，全賴身邊人的支持，他特別要公開向三人致謝，包括太太琦琦、導演杜琪峯和恩師張同祖。
好友杜琪峰
「阿杜係我喺電影上合作無間嘅好拍檔，我同佢合作過好多套戲，佢喺演技上畀咗好多啟發我。同阿杜相處落，佢份人性格正直，係娛樂圈中嘅稀有品種，世間絕無僅有，佢對朋友亦好真摯，係人生難得嘅好朋友。其實喺娛樂圈中太多風花雪月嘅朋友，所以就算僅得一、兩個知己，我已經覺得好足夠，而阿杜就一定係其中一位。無論我可唔可以憑《黑社會》攞到最佳男主角獎，我都必定要多謝阿杜畀咗呢個演出機會我，等我有機會發揮演技。」
賢內助琦琦
「琦琦係我背後嘅女人，佢一直默默支持我，對我嚟講佢好重要，佢係我得唔得獎都要多謝嘅人。我成日拍戲，收工時間都唔固定，有時凌晨返一陣屋企又要出去開工，琦琦瞓瞓吓都唔知老公去咗邊。我專注工作，都冇時間陪佢，好彩琦琦好明白事理，亦好體諒我。我主外，琦琦主內，佢專心照顧好家庭同囡囡，等我可以好放心去拍戲。佢喺我心目中係一個好太太，喺囡囡心目中係一個好媽媽，喺岳父岳母心目中係好女兒。」
恩師張同祖
「祖哥係我入行冇耐，拍戲認識嘅前輩，佢成日喺片場教識我好多嘢，好似我個老師咁。祖哥為人和藹可親，佢成日教我人生道理，同埋一啲拍戲嘅態度。祖哥要我學識點去衡量每件事嘅輕重，佢話識得分輕重，自己先可以掌握箇中嘅道理，佢講嘢又真係好有point嘅，係一個我好尊敬嘅長輩。」
