中央領導人猛講施政要「以人為本」，香港官員齊齊緊跟北京路線，遇到天災人禍自動波做親民動作。警員朱振國遇襲後傷勢嚴重，至今仍未康復，前日朱母接受電視台訪問，報紙噚日又大篇幅報道佢嘅慘況，朱振國即時成為全港焦點，一哥李明逵更晨早就去醫院探佢。
八方聽聞，政府總部對朱振國病情都好緊張，知情人士話噚日特首高官「早禱會」上，局長就傾過搵醫好劉海若位「神醫」，北京首都醫科大學宣武醫院神經外科主任凌鋒嚟香港睇睇朱振國嘅問題，保安局局長李少光率先表態，話好想幫朱振國，會盡全力協助佢家人，不過佢主管保安事務，對醫療問題好外行，唔知點入手好，想衞生福利及食物局局長周一嶽幫幫手，周局長當然義不容辭，話有辦法搵到國內醫生搭路，相信由特區政府開聲，凌鋒會畀面。
肥平識凌鋒媽媽
當眾人目光集中喺周一嶽面上嘅時候，會議室一角忽然傳出另一把聲音，話我都有計喎，大家回頭一望，搭「嗲」者竟然係民政事務局局長何志平，肥平有幾多斤両，在場人士心中有數，呢亭棘手嘢，肥平你都有計？
大家可能唔記得，或者唔知道，肥平係一個眼科大夫知情人士話，肥平見大家七嘴八舌無乜頭緒，先施施然透露自己同凌鋒個媽媽好熟，這時各人即時「叮」一聲記起肥平當年幫過唔少北京權貴睇症，講到喺北京嘅天地線，肥平可能勁過唔少局長，佢仲交咗個電話號碼畀李少光，話有乜要幫手，即管開聲啦。
肥平身邊人話，由於凌鋒媽媽係國內有名嘅眼科醫生，肥平當年去北京醫學交流，示範做眼科手術時，凌鋒媽媽就企喺旁邊觀摩，三年前凌鋒嚟香港主持「當代傑出華人科學家公開講座」，肥平曾經同佢見面，總算係相識一場，咁今次朱振國認真好彩嘞。雖然高官對朱振國病情咁上心，不過官場中人對「神醫」能否帶來奇迹唔敢太樂觀，總之希望還朱媽媽一個心願啦！
傳真︰2623-9278
電郵︰[email protected]