上星期Nike終於推出了第一輪世界盃波衫，真係千呼萬喚始出來，打響頭炮有大熱巴西及亞洲新勢力南韓。據波衫舖老闆講，大家都一致睇好巴西，更睇好嘅係細哨嘅號召力。第一水返貨嘅朗拿甸奴熨字相當多，去貨理想，而朴智星嘅熨字更供不應求，需要訂貨。朴智星真係咁勁，仲威過細哨？非也，事關供應商最初只提供幾套朴智星熨字，係睇小呢位曼聯翼鋒嘅叫賣力定玩緊苦肉計？我諗實情係特登做到好限量，想谷行佢，造個勢出嚟等啲球迷排隊買！
順道提提大家，最近有好多世界盃熨字充斥市場，唔好以為大舖就無假貨，下個禮拜再次教大家點分辨真假熨字，畀幾日時間我去索索料，明查暗訪睇吓邊間係黑店，我講得出就做得到，知驚，就快啲改邪歸正，唔好再賣假字啦，大嗱嗱攞兩嚿水買假字熨落件幾嚿水嘅波衫上面，真係好Hurt㗎！
352大本營（27707352）
地址：旺角西洋菜南街38-40號蒂高商業大廈9樓
