細個睇過套電影《天師鬥殭屍》，帶點黑色幽默，故事講男主角鄰屋有不速之客入伙，發現原來係吸血殭屍同活死人，男主角就請來電視節目《FrightNight》主持人一同消滅殭屍，最後連累朋友變成人狼而女友就變成女吸血殭屍，小朋友睇嗰時又驚又緊張，之後一大串港產殭屍片非常興旺，當年「驅魔祖師」一定以林正英為首，不久港式殭屍片死亡，無記錯應該是林正英的《音樂殭屍》為最後一套殭屍大作。
多年之後只有《見鬼》及《陰陽路》系列較受歡迎，後者差不多可以繼《黃飛鴻》之後成為最長壽系列電影，當中有十幾套片都成為爛片之王，甚至無上過畫就出了VCD，《見鬼》系列都不斷走下坡，其實近年有一套非常值得大家一睇嘅新式殭屍片，唔係荷李活《幽靈刺客》、《妖夜尋狼》同《殺出個黎明》，而係由俄羅斯人拍攝的《守夜人》三部曲，今個國際電影節亦有參與公映，故事講述吸血鬼分成兩大派別，分別是守日人同守夜人，第一部曲主要交代兩大勢力的由來，為第二部曲伏線鋪路，上年有幸從DVD看到第一部曲，的確大開眼界，非一般的電影手法，逼力直迫《廿二世紀殺人網絡》，第二部曲《守日人》筆者剛從朋友手上借來看，緊張得要死呢。《守夜人》第三部曲相信會比首兩集更震撼，好想快啲有得睇！港產鬼片想有突破，要向俄羅斯人偷偷師喇。
