從影三十多年、現年五十一歲的任達華，兩年前憑電影《PTU》獲提名金像獎最佳男主角，結果被《大隻佬》的劉德華擊敗。從未得過影帝的任達華，這次與梁家輝由《黑社會》爭做龍頭大佬鬥到頒獎台，梁家輝還有兩部電影入圍，加上賽前家輝的呼聲略高一線，任達華可否在頒獎台上有零的突破，今晚金像獎頒獎禮自有分曉。 撰文：比華利
任達華和梁家輝早在電影《黑社會》中，爭做幫會龍頭，任達華在戲中為鞏固話事人地位，遂兇狠殺掉張狂的梁家輝。今晚舉行的第二十五屆香港電影金像獎頒獎禮，影帝幾乎是任達華和梁家輝之爭，二人由幫會鬥到頒獎台，究竟鹿死誰手？
任達華賽前接受本報專訪時表現信心十足，他說：「最終邊個攞獎，我都會戥佢開心，不過我最希望《黑》片可以拎到最佳導演同最佳電影兩個獎，因為拍戲係teamwork，呢兩個獎先證明到每位演員嘅付出都冇白費。」
三勁敵各有所長
任達華怎看其他角逐影帝的三位對手？他先談憑兩套電影《黑社會》和《長恨歌》獲提名的勁敵梁家輝：「家輝兩套戲都演得好，兩套戲都唔同戲種，所以參選起嚟就畀到評審好多空間，所以一定着數啲。」任達華認為家輝哪一套電影的演技較出色？「唔同戲種好難比較，佢將《黑》片中貪婪嘅大D演得好突出，至於《長》片嘅角色就好有戲味。」
郭富城已憑《三岔口》奪取了台灣金馬影帝，任達華對此說：「城城喺戲中扮演警察，佢真係放低咗自己以前嘅嘢，好認真去演出，大家明顯睇到城城好努力突破自己。」而劉德華在《童夢奇緣》中由年輕演到老，任達華則認為：「華仔呢套戲好溫情，好感人，佢好適合演呢類角色，演得非常細膩。」問任達華若可以在角逐影帝的五部候選電影中選擇角色，他會演哪一套？「我必定都會揀番做《黑》片嘅阿樂，呢個角色畀到我好大嘅發揮機會。」
譚炳文值得表揚
《黑》片雖在金像獎中榮獲九項提名，任達華卻戥戲中一些沒獲提名的演員感到不值，「我好欣賞炳哥（譚炳文）演嘅老叔父，真係演得好，根本冇人可以代替，就算我以演戲做終身職業，到我好似炳哥咁嘅年紀去演番呢個角色，肯定冇佢演得咁好，佢都應該值得表揚。」
任達華的演技精湛，但他不認為演戲是天賦才能，「我唔認同演員係天生識做戲，演技出色絕對係後天努力嘅成果，正如我亦唔相信世間上有天才，所有有卓越成就嘅人都必定經過多番努力，就算一啲發明家，佢哋都只係一小撮人。」
問任達華看好影壇哪一位新人？他竟然沒提過影壇當今任何一位新貴的名字，卻看好憑《黑》片角逐金像獎最佳編劇之一的游乃海，「我同佢相處過，發覺佢除咗寫劇本叻，佢份人都好有演戲潛質，特別有喜劇細胞，佢性格又開朗，其實好啱做演員，我好希望將來有機會同佢攜手登上大銀幕。」
教囡囡分正與邪
任達華和名模太太琦琦的愛女任晴佳（Ella）已十五個月大，問到這位廿四孝老竇待Ella長大後，可介意讓她欣賞《黑》片？可擔心會影響女兒心目中的慈父形象？「佢想睇，我一定會畀佢睇，如果我扮演壞人角色嘅戲，我仲會陪佢一齊睇，一邊解釋畀佢聽，等佢可以好清楚分辨正與邪。」
不過任達華就強調片場絕對是囡囡的禁地，「我唔希望佢嚟片場探班，唔希望佢細細個腦海就接觸到呢樣嘢，留有拍戲嘅影子，咁樣對佢成長有一定嘅影響，不過，將來佢長大，鍾意點樣揀自己嘅職業，我都會尊重，女大女世界嘛！」
任達華除了鍾愛攝影，近年亦喜好欣賞水墨畫，尤其對中國水墨畫畫家吳作人的作品愛不釋手，「因為水墨畫對顏色發揮有好多唔同層次，睇咗呢啲畫就啟發到我演繹角色，奸角都分好多唔同層次。」
後記：買生果𠱁囡囡
任達華對囡囡晴佳寵愛有加，不用開工的日子，會留在家中陪伴女兒。任達華這天做完訪問後，特別駕車到北角買水果給囡囡，他說：「因為嗰度間生果檔嘅生果新鮮啲。」認真廿四孝老竇！
攝影：葉君海 場地提供：Gossip51
