八方噚晚喺新城電台個活動，見到老牌地產商方潤華，佢一見八方就笑騎騎話，係為咗捧老友李嘉誠場而來，事關佢同超人識咗幾十年，又同埋一個球會打golf，每個星期都會打吓友誼波，呢個習慣已經維持咗廿幾卅年，講到興起，仲即刻喺手機度，show咗張佢同超人兩個全副高球裝嘅合照畀八方睇。
八十有二嘅方伯話，雖則超人每次都讓佢四桿，但雙方打十場，佢仍然輸足七、八場，誠哥同方伯輸贏梗唔會講錢，咁輸乜？係波，事關輸幾多桿，就要送番幾多個波畀對方，不過就唔場場計，而喺年尾一次過計數。
鬼咁精靈嘅方伯講打波就乜都得，但一講到超人就快出世個粒孫，佢就即刻耍手擰頭，淨係話周不時有同超人傾吓「玩」孫嘅樂趣，係「玩」，唔係「湊」，事關呢啲粗重工夫，梗係留番畀新抱同工人。
傳真︰2623-9278
電郵︰[email protected]