熟識我的朋友都知道雖然我總愛花錢買不同的Accessories，但就從來不會花錢買電話繩，這個原則我一直都幾堅持，心想點解要用電話繩，手提電話放在褲袋裏就唔怕電話響起來時搵唔到，用咩電話繩?!不過，本來我對電話繩這個物體都唔係咁厭惡，但唔知幾時開始中學生們又好、大學生們又好、師奶又好、潮人都好，忽然都「日本妹」起來，手提電話嗰「抽」電話繩往往仲要比個電話重，夠晒本末倒置！講電話的時候一堆公仔好似跟他們面貼面，實在令我見到都眼火爆！於是同自己講，有錢都唔會買，費事變得隨波逐流（別人的生日禮物除外，喺呢方面我又覺得電話繩是個可愛的發明，試問仲有邊樣的禮物款式可以多到咁，價錢方面咩價位都有，畀唔同程度的朋友可以對號入座，而且大部份人都一定會用）……
不過最近有一條掛頸的電話繩終於令我有使錢兼邁出第一步的衝動，這條幸運兒就是x-girl新出的桃紅色、貌似BV織皮的掛頸電話繩。我同自己講，之前在Friend面前撐到咁「行」話一定唔會買任何電話繩，今次自己居然走去買？實在冇面見人！其實我已經替自己想好了一些狡辯的理由，你話邊個理由下台階會好啲呢？理由一：掛頸電話繩算是Functional一點，冇純裝飾電話繩般天地不容；理由二：人哋送，唔用好嘥……