恒指大部份時間處於負數領域，埋單則仍有60點進賬，繼續多得中移動（941）又升0.70元，對恒指貢獻43點。
中移動C輪4451：有隻中移動C輪9695，打入龍虎榜第4位，收62仙，升44%，唔算亁炒，有1.4球易手，銀碼68萬。隻輪唔知有乜咁好，本月18日到期，扣埋假期，下周一最後買賣，行使價40元，溢價2.4%，槓桿率7.3倍（有效5.7倍），末日輪唔使理引伸波幅。正股造45.10元，平水計，隻輪只係值51仙。
賭中移動C輪，應該揀4451，8月初夠鐘，輪價54仙，溢價2.6%，槓桿率8.4倍（有效6.2倍），引伸波幅30.6%。不過，正股升咗咁多，唔夠1個月急漲9.15元，9RSI去到83，買輪之前先要諗吓獲利回吐4個字。
和黃C輪3532：和黃（013）升0.15元咁大把，C輪9786升46%，仙輪有時波動非常誇張，隻輪收7.3仙。唔係亁炒，有93球易手，銀碼6.7球。下月底夠鐘，溢價6.9%，槓桿率100.3倍（有效21.9倍），引伸波幅22.1%。
雖然有刀仔鋸大樹呢句廣東話，但點解要輸咗把刀仔？9786買唔過。賭和黃C輪，3532至係正路之選，10月初到期，輪價58仙，溢價3.9%，槓桿率12.6倍（有效7.7倍），引伸波幅23.1%。
章盛