阮小儀是家中獨女，不但萬千寵愛在一身，亦因而被母親高度重視，限制多多，更嚴禁她結交異性朋友。小儀人仔細細，卻滿腦子鬼主意，還教男生來電時扮女仔聲避過母親耳目，可惜一次私約鄰校男生到淺水灣鴛鴦戲水，卻被舅公撞破好事兼篤背脊，事後更被阿媽打到飛起！
商台DJ阮小儀跟拍檔森美一樣，自小在屋邨長大，家住華富邨。由於是家中獨女，小時候就與左鄰右里的小朋友作伴，她笑說：「嗰陣我成日聽到啲朋友仔一陣話畀細佬搶晒啲玩具，轉頭又話俾阿哥攞晒啲零用錢，覺得佢哋好慘，仲以為有兄弟姊妹唔係咁好。」
計準時間睇電視
由於小儀是獨女，一早已明白自己身負重任，長大要出人頭地供養雙親，她說：「我由細到大讀書都係自己畀壓力自己，中五放榜前阿媽緊張到瞓唔着，後尾知道我考得唔好，佢仲喺阿姨面前喊。」
詭計多端的小儀，讀書之餘亦不忘娛樂，小時候為了追看卡通片，又不想被母親發現，所以每次都趁對方到街市買餸這半小時內偷看電視，她說：「因為電視機開得耐會熱，所以次次都係睇十五分鐘就熄機，之後嗰十五分鐘就係散熱時間。」
男扮女聲通電話
小儀表示母親對她管教甚嚴，直到中學階段仍不准她跟異性做朋友，小儀說：「嗰陣一有男仔打嚟我屋企，我就會叫佢哋扮女仔聲，或者叫佢哋啲家姐細妹打嚟，再唔係就叫佢哋一聽到我阿媽把聲就收線。」有次小儀偷偷約會鄰校男生到淺水灣游水，豈料被舅公撞破，對方還向母親通風報信。小儀笑說：「嗰次真係斷正，之後我仲向阿媽講大話，話去咗同學仔屋企做功課，當然俾佢打到飛起啦！」
採訪：李珮洳
部份圖片提供：阮小儀
