傅穎（Theresa）最近忙於宣傳新片《至尊無賴》，提到拍戲初段不習慣，講對白頻食螺絲，她自嘲記性差似患老人癡呆症，加上經常問導演陳嘉上對她的評價，令陳嘉上感到厭煩。
傅穎早前獲電影《至尊無賴》導演陳嘉上睇中她那張冷靜的面孔，選了她參演該片，Theresa為了令外表看來更成熟，將頭髮燙鬈，但在拍攝初段，她嚴重缺乏自信，壓力非常大，幸得導演不斷鼓勵，才能解開心結。
下半年出唱片
Theresa日前說：「我以前拍戲經驗好少，有都係客串，唔會有好多戲份，呢套就唔同，我飾演頭腦好冷靜、處變不驚嘅探員，仲要講好多資料性嘅對白，同我根本就係兩個人。我啲記性差到好似有少少老人癡呆症，又每事問，問題少女咁，一啲都唔冷靜。」
每拍完一場戲，Theresa便會問導演陳嘉上對她的評價，連導演都感到厭煩，她說：「之後佢同我講，如果場戲唔OK，佢就唔會收貨，如果我衰咗，即係等如佢衰咗，套戲係佢拍嘅，叫我畀啲信心。最記得有一場戲，我講極都講唔到對白，本來導演想改對白，但係我話畀多一次機會我，終於做到，佢仲豎起隻手指公讚我，嗰時真係感動到有啲想喊，真係好多謝陳嘉上。」
歌唱事業起步比Cookies的鄧麗欣與吳雨霏慢，Theresa一點也不擔心，她說：「唱歌同拍戲都好鍾意，我上半年拍戲，下半年會出碟，我知道工作嘅安排。」
採訪：胡比
攝影：林德雄
髮型：VincePang＠ILColpo
服裝提供：Bella
場地提供：CennaLounge
