跟友人孭住背囊，平平哋走去懇丁潛水，所住民宿有個超友善又好客的老闆娘，不但煮埋早餐等我哋起身，仲主動做埋柴可夫，載我哋周圍玩。佢知我哋想潛水，就介紹我哋去附近的海灘找「大哥」。嘩，聽個名已知份量十足。果然，「大哥」一副豪邁氣派，不收分文就可以潛上大半天，仲有香蕉船呀、水上電單車呀，他的「兄弟」還充當私人教練，個個一身古銅色肌肉，好不型仔呢！最後「大哥」還盛意拳拳邀請我哋一起晚飯。
台灣男人出名無酒不歡，「大哥」更是一埋枱就自隊兩支啤酒，不過並無強迫我哋做陪酒。反而係佢啲「兄弟」忽然NaturalHigh，不斷灌我哋飲，又捉住我哋起勢跳舞，半推半就下奉陪了一小杯。誰知他的「兄弟」開始毛手毛腳，還靠過來我耳邊說了一聲：「我可以親你一下嗎？」糟糕的是我還未來得及說「不」，他那雙充滿酒氣的嘴唇已經貼在我的臉珠上！好惡心啊！太過份了！竟然被強吻！氣沖沖的我一手拖着友人掉頭就走。跑到返民宿先醒起無狠狠的打佢一巴，真係蝕！（五之五）
奇雲