華華每年都睇唔少上市公司年報，講真，好多時睇到瞌眼瞓，鬼咩，本本都係一片字海，冇設計可言，有相嘅都係悶嘅大頭相。但係今年好唔同，唔知係咪經濟好咗，好幾間上市公司都肯揼本同年報裝身。
除咗早兩日提過嘅恒生年報，啲相有背景有設計有甫士，呢兩日華華收到兩本年報，設計都好有心思，好似細劉劉鑾鴻嗰間利福國際（1212），封面係一幅水彩畫，係佢哋香港崇光及上海久光百貨喺燈柱上嘅廣告標徽，年報內仲有唔少水彩畫插圖，包括崇光嘅Freshmart超級市場、化妝品櫃枱同商品等插圖，令人幾醒神。
另一本年報係中電信（728）嘅，為咗襯番佢哋「積極轉型，提升價值」嘅標題，搵咗個細路女吹散蒲公英種子相做封面，寓意生生不息，提醒大家間公司既有穩固根基，又有小孩和蒲公英一樣嘅動力同生機，都咪話表叔老土。