噚日，孫柏文隻金手指為大家篤咗一項可能在兩年之內，幫大家嘅本金翻十番嘅投資建議。就係大家做九成五按揭，喺加拿大阿爾伯達省（Alberta）買樓，因為孫柏文相信，阿省樓市喺06、07年，乘埋可以升六成。噚日又講過升市嘅主要原因，係因為油價徘徊喺40美元一桶以上，令到石油公司可以抵消開發油沙嘅成本，繼而將開採油沙嘅發展項目上馬。又因油沙項目需要大量工程師同普通工人，令到阿省人工攀升，市民購買力增高。最重要係，雖然阿省市民有買樓能力，不過，個個都帶有八十年代中，石油泡沫爆破令到樓市仆直嘅陰影，所以好多人都仲未買樓入市。
要再過多幾年，油價真係維持係40美元一桶以上，阿省市民先至敢完全相信，樓市唔會再一次仆直。雖然𠵱家已經有人信油價唔會跌穿40美元一桶，不過離全民入市嘅一刻仲有幾年。所以阿省樓市仲有大把上升空間。咁噚日亦都應承今日講畀大家知阿省城市邊度嘅樓好買。所以今日就幫大家做一個分析。
實地視察的結果
首先，孫柏文覺得阿省所有物業都應該升，不過如果買投資物業，當然要留意兩個最大影響物業炒值能力嘅因素。第一，就係物業成交流通量；第二，就係物業租金收入潛力有幾大。所以，金手指為大家篤嘅建議，就係保守啲嘅投資者喺阿省兩大城市──卡爾加里（Calgary）或者埃德蒙頓（Edmonton），買近市中心嘅公寓單位。因為經過孫柏文實地視察，兩個城市都出現公路塞車情況，所以近市中心樓會愈來愈吃香。又因為公寓單位流通量比獨立屋高，所以到時候出貨都會易啲。最後，公寓單位比獨立屋易出租，所以租金收入都會比較穩定。
進取啲嘅投資者可以考慮買麥嘜厘堡（FortMcMurray）畀單身人士住嘅樓。麥嘜厘堡係油沙區中唯一嘅城市，人口只得幾萬，不過因為附近有多個幾百億嘅新油沙項目，所以人口會不斷膨脹。而因新建物業增長數目，不及人口膨脹速度，所以樓價必升。不過，麥堡係一個冰封嘅地獄，一個很難住嘅地方，令到搬去嘅人，多數係單身人士因工作而去住，就算有家室，都只會係搵食嗰一個住係麥堡，所以，如果買麥嘜厘堡嘅樓，就一定要係嗰啲畀單身人士住嘅。
最後，要買就要快，唔係到時升咗咪話孫柏文隻金手指冇篤過畀大家。
孫柏文