喺柏林影展奪得最佳音樂銀熊獎嘅電影《伊莎貝拉》，前晚喺灣仔會展舉行首映，女主角梁洛施（Isabella）着住條價值四萬蚊嘅新款LV裙亮相，而寰亞電影公司老闆林建岳及旗下藝人黃秋生、何韻詩都有畀面出席。
呢部戲日前成為香港國際電影節嘅開幕電影，特首曾蔭權同老婆都有到場欣賞，問阿澤特首睇完佢部戲有乜評語？阿澤即時收起一貫嬉皮笑臉，好認真咁轉述特首嘅說話：「做得好，幾好吖你！」阿澤話聽到當然好開心，因為特首夫婦平時貴人事忙，都睇到凌晨十二點幾至走。
彭浩翔演MV趕客
而Isabella就話金培達作咗首同名歌《伊莎貝拉》畀佢，都係講父女情，搵咗陳少琪填詞，而杜汶澤就負責執導，阿澤仲大爆彭浩翔諗住做個MV嘅男主角，佢當然即刻打沉對方嘅諗法，話佢肯拍都未必有人肯睇喎！
