煲碟王:《魔幻王國》孖碟版 戲加Bonus煲足12粒鐘

煲碟王:《魔幻王國》孖碟版 戲加Bonus煲足12粒鐘

以5粒星為滿分,電影《魔幻王國:獅子.女巫.魔衣櫥》可以攞4粒星---假如觀眾係小學生又或有小朋友的家長。改編自愛爾蘭作家C.S.路易斯《納尼亞傳奇》的《魔》,講述4位小朋友聯同獅子王,與白女巫展開正邪之戰,情節簡單易明,加上由製作《魔戒》、《哈利波特》班底炮製視覺特技畫面,片中的神話生物、怪獸等塑造得似層層,還有幾幕冰山崩裂震撼場面,以及異獸大戰,對小朋友而言夠晒吸引力。

記者:招佩珊

其實,《魔》片的吸引力,最先可以說是來自其製作班底,由《史力加》1、2集的導演安德魯亞當斯執導,負責視覺特技畫面的就有為《魔戒》、《蜘蛛俠》、《哈利波特》做CG特技製作的頂級公司聯手合作,結果,片中的視覺特技效果沒有叫人失望。

■單碟裝$113

區碼:3區
發行:洲立影視
聲效:DolbyDigital
字幕:繁體中文、英文、泰文、印尼文、韓文、馬來文

■限量雙碟珍藏套裝$139

故事簡單 畫面豐富

故事講述4兄弟姐妹無意間走入魔衣櫥,去到納尼亞魔幻王國,與獅子王及其勇士對抗惡毒的白女巫及怪物手下,正邪對立顯而易見;由魔幻題材,到CG製作單位、新西蘭為拍攝場景等,均與《魔戒》相似,但《魔幻王國》情節比《魔戒》簡單,由4位小演員演出,小朋友睇得更有投入感,可以說是兒童版《魔戒》。不過,尾段獅子王像耶穌一樣,為救叛逆者而犧牲,最後卻在「石桌」上復活,這類犧牲救贖的訊息,小朋友未必消化得來,最好有家長指引,所以《魔》最啱一家大細睇。原著小說只有百多頁,落在導演手中卻能變作兩個多小時的電影,片中幾幕特技場面帶來相當的視覺刺激,特別是冰山崩裂、冰湖裂開那段,場面震撼!

■小演員事前被蒙眼,第一次睇到雪景的真情流露,拍下放入片內。

■白頭佬失驚無神出來派兵器給小主角當禮物,唔講句聖誕快樂都唔知佢係乜水。

尾段大戰 掀高潮

片中有多達60種各式各樣的魔獸及奇幻角色,例如有忠義的半人馬騎兵、雄鷹戰士、豹戰士,邪惡一方就有獨眼巨人、樹精、食人魔等,古靈精怪程度拍得住《魔戒》!不過,對於非家長的成人觀眾,如筆者我來說,着實有點納悶,嫌電影節奏去得唔夠快,尤其是頭1小時「講多過做」,之後高潮起伏唔多,一幕冰山崩裂之後,要等到完場前半小時那場正邪大戰,先至叫做睇得肉緊。好可惜獅子王一出場,撲向白女巫唔使5秒就講了句:「Thewarisover!」完場快過閃電。

■呢幕精采的冰山崩裂,大哥插劍59次,擺個靚Pose導演先收貨。

■苦等兩小時,終於來到大戰戲肉!

10個鐘Bonus睇到儍

《魔幻王國》分單碟同限量雙碟兩個版本,前者收錄四分半鐘NG片、有關電影小知識,以及幕後人員旁白解說;限量雙碟版就有小冊子、明信片、書籤同納尼亞地圖,仲有近10小時額外收錄!包括製作花絮、導演及製作人員解說、有關異獸角色的神話傳說,而部份小說情節亦以講故事形式補充在Bonus內。最值得睇是由4位小演員親述試鏡、被選中的入行經過同拍戲感受,當中不乏鏡頭以外真性情。戲連Bonus一口氣睇12小時,真係睇到眼都定!

■人手抬住個大獅頭就住拍戲,估佢唔到!

Before
■找不同---請找出呢兩張相N個不同之處。

After
■答案:經CG加工後的畫面,各位怪獸多番對腳,有兩隻大熊拉戰車,還有……