港股衝上16000大關後，假前略為整固，假後又再大升，恒指高收16411，大升311點，成交更大增到456億元，對晒辦！H指大升109點，逼近7000大關，照度上去，今個升浪，H指目標係7300。至於恒指，16500水平會有阻力，但整固後可再上，樂觀估計可見17500，而且好大機會在1個月內可完成。
今次升市，暫時係藍籌同大中資股做火車頭，但細價股同落後股稍後會接力，而升幅亦會好可觀。追捧落後股，內地地產股中，有一隻可以留意，就係湯臣集團（258）。今年1月3日起計，湯臣由2.075元升到近期高位3.175元，升幅53%。
內地地產股今年大受追捧，就舉幾個較為突出嘅例子，華潤置地（1109）由3.225元升上6.25元，升幅93.7%；沿海家園（1124）由0.32元升上1.05元，升幅228%；上海置業（1207）由1.05元升上1.99元，升幅89.5%；天安中國（028）由2.40元升到5.45元，升幅127%。湯臣相比，明顯係大落後。
成交大增快破位
湯臣主力在上海浦東發展地產，擁有樓面600萬方呎，由於地皮在早年買入，現時已大幅升值。「湯臣一品大廈」係位於浦東黃浦江畔的超級豪宅，樓面面積逾150萬方呎，去年底以「天價」平均每方呎近1萬元開售，相比成本價不足2000元，係咪賺到笑。
計數唔好計到盡，就以每方呎賺2500元，獲利已37.5億元，湯臣發行12.4億股，單係「湯臣一品」，每股已獲利足足3元。若每方呎賺4000元，每股已賺足4.80元；若賺4500元，每股賺6.06元，足足係股價嘅兩倍。湯臣在上海仲有近10個發展項目，升值之數好襟計。
基金同大行高度看好內地地產股，湯臣亦已有人睇中，有消息指有大行已安排同湯臣做「路騷」，以湯臣股價相比實際資產淨值折讓咁大，基金一郁手，股價冇停留。
湯臣上月下旬由2.50元起步，到3.175元後唞氣，形成上升三角形，噚日成交大增，已有破位向上之兆，升破3.125元後升浪再現，照度上去，短線目標係3.80元。
郭兆誠