氣勢沒法擋，恒指升幅超過310點。買嘢好似唔使畀錢，總成交456億元。
1隻中移動（941），對恒指貢獻已經係127點，9RSI上到82，咪貪勝不知輸。昨日推介嘅滙控C輪2228同中銀C輪9068，1隻升20%，1隻升得9%。9068升得唔夠，要加碼。
交行C輪2292：喺建行（939）派成績表前，交行（3328）冇跟大市郁，平收4.95元。炒家睇住收市後建行盤數係點。
建行盤數出嚟見人，去年賺471億元人民幣，跌4%，市場則預期佢會賺488-517億元。有啲人對佢嘅業績或者會有少少唔滿意，但咁，交行去年10月招股時預測賺420億元，實數超標12%，又算理想。估計交行喺建行派成績表後，會跟番大市三幾毫，趁平買交行C輪可也，主角係2292。隻輪7月中夠鐘，輪價62仙，溢價1.2%，槓桿率8倍（有效6.3倍），引伸波幅29.1%，數據好靚。
建行C輪2293：建行昨日先跌5仙，收3.60元。盤數出咗之後，估計會彈番，趁低買C輪。2293最正，8月初到期，輪價56仙，溢價1.9%，槓桿率6.4倍（有效5.6倍），引伸波幅25.7%。建行有啲下半年夠鐘嘅C輪，溢價逾15%，咪手痕，除非啲錢多到冇地方使。
章盛